უკრაინელი დიპლომატის პოზიცია ძალიან არადიპლომატიურია, ის განცხადებები, რომლებიც მან გააკეთა, ძალიან დამაზიანებელი ნაბიჯია იორმხრივი ურთიერთობებისთვის, – ამის შესახებ საპარლამენტო უმრავლესობის წევრმა, გიორგი ხელაშვილმა განაცხადა, რითაც გამოეხმაურა საქართველოში უკრაინის ელჩის მოვალეობის შემსრულებელლის, ანდრი კასიანოვის ბრიფინგს.
მისი თქმით, ვინაიდან უკრაინა დღეს არის ძალიან რთულ მდგომარეობაში, უკრაინული დიპლომატიის მსგავს უხეშ გამოვლინებებს, გაგებით უნდა მოვეკიდოთ.
„ბატონი კასიანოვი უკრაინის დიპლომატიაში არ არის გამონაკლისი. მსგავს განცხადებებს აკეთებდა უკრაინის ელჩი გერმანიაში და ზოგიერთ სხვა ქვეყანაში. ძალიან ძნელი სათქმელია, როდესაც შენი ქვეყნის ინტერესებს ეხება, მაგრამ, მე ვფიქრობ გაგებით უნდა მოვეკიდოთ უკრაინული დიპლომატიის ამ გარკვეულ უხეშობას და არაპროფესიონალიზმს, ვინაიდან მათი ქვეყანა არის აბსოლუტურ სასოწარკვეთილებაში, ძალიან რთულ პოზიციაში და ცდილობს გაუმკლავდეს აგრესორ, უზარმაზარ ბირთვულ სახელმწიფოს. ამ დროს, ნებისმიერი უკრაინელი დიპლომატის დავალებაა, რომ ნებისმიერ დახმარება მიიღოს უცხო ქვეყნებისგან და თუ შესაძლებელია სადმე, რაიმე სახის სამხედრო დახმარება უკრაინის მიმართ, თუნდაც ეს სხვა ქვეყნის ომში ჩართვას ნიშნავდეს, ესეც გააკეთოს. შესაბამისად მე არ მიკვირს ბატონი კასიანოვის ლამის პირდაპირი მოწოდებები, ასევე, უკრაინის უშიშროების საბჭოს მდივნის დანილოვის ამასწინანდელი განცხადება, რომ კარგი იქნება თუ უკრაინელი ხალხის გარდა, სხვა ხალხებიც დაიღუპებიან. მესმის მათი პოზიცია, თუმცა შეუძლებელია, რომ ქართველი ადამიანი ამას რამენაირად დაეხმაროს.
რაც შეეხება უცხოეთის ქვეყნების პოზიციას უკრაინის დახმარებასთან დაკავშირებით, ჩვენ ვხედავთ, რომ, ვისაც შეუძლია, განსაკუთრებით ნატოს ქვეყნებს, რომელთაც ამერიკის ბირთვული ქოლგა იფარავს, ისინი აქტიურად ეხმარებიან უკრაინას შეიარაღებაში. მაგრამ, თუ დააკვირდებით არცერთი ქვეყანა არ გზავნის მოხალისეებს პირდაპირ უკრაინაში. მეტიც, ისინი არ ეხმარებიან მოხალისეებს რომ იომონ უკრაინაში, რადგან, პოლიტიკურად ყველა მთავრობისთვის წამგებიანია, პირდაპირი პოლიტიკური დარტყმაა ნებისმიერი ხალხისთვის, როდესაც მათი მოქალაქეები იღუპებიან საზღვარგარეთ, ამიტომ ამას არცერთი მთავრობა ამას არ აკეთებს. ერთადერთი პოლიტიკური ძალა, რომელიც ამისკენ სიხარულით მოუწოდებს საკუთარ მოქალაქეებს, ეს არის ქართული რადიკალური ოპოზიცია“, – განაცხადა ხელაშვილმა.