შემიძლია დავადასტურო, რომ საინფორმაციო გამოშვება რჩება ეთერში იმ ფორმით და იმ დოზით, როგორც ის დღეს არის, – ამის შესახებ ტელეკომპანია „მაესტროს“ საინფორმაციო სამსახურის ხელმძღვანელმა ხატია ქვათაძემ ჟურნალისტებთან საუბრისას განაცხადა.
როგორც ტელეკომპანია „იმედის“ სამეთვალყურეო საბჭოს თავმჯდომარე ირაკლი რუხაძესთან შეხვედრის შემდეგ ხატია ქვათაძემ აღნიშნა, უკვე დასრულებულია მოლაპარაკებები.
„მინდა დავამშვიდო ყველა, ვისაც ჰგონია, რომ „მაესტროზე“ საინფორმაციო გამოშვება აღარ გავა. ეს ასე არ იქნება. არხზე არ იცვლება არაფერი, ყოველ შემთხვევაში, უარესობისკენ. არ იხურება ამ ეტაპზე არც ერთი გადაცემა და ცალსახად შემიძლია დავადასტურო ის, რომ საინფორმაციო გამოშვება რჩება ეთერში იმ ფორმით და იმ დოზით, როგორც გადის დღეს. შეხვედრა შედგა არხის მენეჯმეტთან, ჩვენ გავცვალეთ მოსაზრებები და დავსვით შეკითხვები. რეორგანიზაციას რაც შეეხება, სავარაუდოდ იქნება გარკვეული ცვლილებები, რაც მათი მხრიდან აღინიშნა, თუმცა ეს არ ნიშნავს იმას, რომ ისინი გარკვეული მოცემულობით მოდიან ჩვენთან სასაუბროდ. თუ რაიმე ცვლილება იქნება, მოხდება ლოგიკური, ბუნებრივი და ყველასთვის გასაგები“, – განაცხადა ხატია ქვათაძემ.