საქართველოს მთავრობის სტრატეგიული კომუნიკაციების დეპარტამენტის უფროსის მოადგილე ბექა მჭედლიშვილი სოციალურ ქსელში პოსტს აქვეყნებს.
“სახელმწიფო 3 ახალ ვერტმფრენს 21 მილიონ ევროდ შეიძენს
შინაგან საქმეთა სამინისტროში, ფრანგულ კომპანია “Airbus Helicopters”-თან 3 ახალი ვერტმფრენის შესყიდვის მიზნით ხელშეკრულება გაფორმდა.
“H145” მრავალფუნქციური ვერტმფრენია, რომელსაც შეუძლია შეასრულოს პოლიციური, სატრანსპორტო, სამძებრო და სამაშველო ფუნქციები.
ახალი ვერტმფრენები სრულად იქნება დაკომპლექტებული ხანძართან ბრძოლისა და სამთო-სამაშველო აღჭურვილობით. მათ გააჩნიათ 2 ძრავა, რაც ზრდის ფრენის უსაფრთხოებას. ამ ტიპის შვეულმფრენი მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, არსებულ ამოცანებთან სრულად თავსებადი იქნება.
“H145” წარმოადგენს “Airbus”-ის ერთ-ერთ უახლეს მოდელს, რომელსაც წარმატებით იყენებენ გერმანიის, შვეიცარიის, საფრანგეთის, კანადისა და სხვა ქვეყნების პოლიციისა და საგანგებო სიტუაციების მართვის სამსახურები.”-წერს მჭედლიშვილი.
