უკრაინის პრეზიდენტის მიმართვას, რომლითაც ვოლოდიმირ ზელენსკიმ საქართველოს ხელისუფლებას მიხეილ სააკაშვილის საზღვარგარეთ გადაყვანა მოუწოდა, სააკაშვილის დედა – გიული ალასანია ეხმიანება.
“მივმართავ საქართველოს ხელისუფლებას, დაიცავით სააკაშვილის სიცოცხლე…ძალიან გთხოვთ, გადაიყვანეთ სააკაშვილი თუნდაც უკრაინაში, ევროპის ნებისმიერ ქვეყანაში, ამერიკაში” – ზელენსკი
როგორც გიული ალასანია აღნიშნავს, უკრაინა სააკაშვილის მდგომარეობის შესახებ კარგად არის ინფორმირებული:
„ძალიან გამახარა ზელენსკის ასეთმა აქტიურმა ჩარევამ, საკმაოდ კარგად არის ინფორმირებული მიშიკოს ჯანმრთელობის შესახებ, ყველაფერი დეტალურად იცის.
ეს უკვე ყველამ იცის და ზელენსკიმ, მით უმეტეს, იცის და უკრაინულმა მხარემ ეს ძალიან კარგად იცის.
რაღა არის სპეკულაცია, ვერ გავიგე, ყველა ექიმის დასკვნები დევს, აბა, რომელია მაშინ სანდო? უსათუოდ ამათი განცხადებაა, ვიღაც ერთეულების, რომლებიც საერთოდ არანაირ კავშირში არ არიან მედიცინასთან, თუ იმ ექიმების?”, – განაცხადა გიული ალასანიამ.
შეგახსენებთ, ვოლოდიმირ ზელენსკიმ ვიდეომიმართვაში საქართველოს ხელისუფლებას მოუწოდა, გადაიყვანონ სააკაშვილი თუნდაც უკრაინაში, ევროპის ნებისმიერ ქვეყანაში, ან ამერიკაში. მისივე თქმით, ის რაც დღეს სააკაშვილის მიმართ ხდება, ბოროტებაა.