სააგენტო „როიტერის“ ინფორმაციით, რუსული კერძო სამხედრო კომპანია „ვაგნერი“ იარაღს ჩრდილოეთ კორეიდან ყიდულობს. ამის შესახებ სააგენტო ანონიმურ წყაროზე დაყრდნობით იუწყება.
„როიტერის“ ინფორმაციით, ასეთი გარიგება სულ მცირე ორჯერ უკვე შედგა.
„გასულ თვეში ჩრდილოეთ კორეამ რუსეთში გააგზავნა სარაკეტო დანადგარები და რაკეტები, რომლებიც „ვაგნერის“ ძალებმა გამოიყენეს“, – განაცხადა „როიტერთან“ საუბარში ანონიმურმა წყარომ.
მისივე თქმით, ჩრდილოეთ კორეიდან მიღებული შეიარაღება უკრაინაში ომის დინამიკას სავარაუდოდ ვერ შეცვლის, თუმცა აშშ შეშფოთებულია ამ შეიარაღების მიწოდების გაგრძელების შესაძლებლობის გამო.
როგორც „როიტერი“ წერს, სავარაუდოდ ჩრდილოეთ კორეიდან რუსეთში იარაღის მიწოდების შესახებ ინფორმაციას აშშ-ის დაზვერვა უახლოეს ხანში ოფიციალურად დაადასტურებს. სააგენტოს ცნობით, არ არის გამორიცხული, რომ კერძო სამხედრო კომპანია „ვაგნერის“ წინააღმდეგ ახალი სანქციებიც მიიღონ, რომლითაც მათ საზღვარგარეთ შეიარაღების მიწოდება შეეზღუდებათ.