სააკაშვილის თავზე მიმდინარე პროცესები არის სამედიცინო და სამართლებრივი პროცესი, რომელიც ტრანსფორმირდება გარკვეული ჯგუფების მიერ პოლიტიკურ პროცესებად და ეს ძალიან აზიანებს ჩვენ ქვეყანას შინ და გარეთ, – ამის შესახებ ვაჟა ფშაველას ფონდის თავმჯდომარემ, ლელა რაზიკაშვილმა გადაცემაში „იმედი LIVE“ განაცხადა.
მისი თქმით, სააკაშვილი ლიდერის იმიჯით არ გამოიყურება და ესეც ძალიან დაბლა სწევს თანაგრძნობის ხარისხს.
„იმ პიარკამპანიით, რომელსაც სააკაშვილის ფრთა საზღვარგარეთ ეწევა, პრაქტიკულად ამით ქართული ნაციის გამარგინალებას ეწევა. გარედან ისე ჩანს ეს, რომ ჩვენ ვართ ნაცია, რომელსაც არ აქვს სიბრალულის უნარი სნეული პრეზიდენტის მიმართ. მე პირადად შეურაცხყოფილი ვარ ამით, რომ გვნათლავენ ისე, თითქოს ვართ თანაგრძნობის უნარის დეფიციტის მქონე ადამიანები და არ გვაქვს ელემენტარული ჰუმანიზმი ადამიანის მიმართ.
მესიჯი, მიშა, წამება და ციხე პირდაპირ ახდენს იდენტიფიცირებას მხოლოდ იმ 9 წელსა და წამებაზე და არა იმაზე, რაც ახლა ხდება. ეთერში რომ შემოვდიოდი ერთმა ჩემმა ახლობელმა ადამიანმა დამირეკა და მითხრა, რომ ის იყო ძალიან ავად ციხეში და წამალი მოითხოვა, რაზეც დაცინვით უთხრეს, წამალი რად გინდა შენთვის ცინკის კუბოა და შემდეგ დაგრგავთო. ერთი სურათია ეს, მეორე კი ოროთახიანი ლუქსი, უამრავი მნახველით. როდესაც ლიდერები ხვდებიან განსაცდელსა და ციხეში, მათ აქვთ საშუალება გამოავლინონ მათი პირადი ღირსებები. ვიცით ლიდერები, რომლებსაც გაცნობიერებული აქვთ, რომ ლიდერის გზა შეიძლება გადიოდეს ციხეზე, განსაცდელზე და ეშაფოტზეც კი. რაღაცნაირად ლიდერის იმიჯით არ გამოიყურება და ესეც ძალიან დაბლა სწევს თანაგრძნობის ხარისხს“, – განაცხადა ლელა რაზიკაშვილმა.