გუშინ, თბილისის საკრებულომ განიხილა და მხარი დაუჭირა მუნიციპალიტეტის ბიუჯეტს, რომელიც უპრეცედენტო მოცულობით – 1 მილიარდ 632 მილიონი ლარის ოდენობით დამტკიცდა. ამხელა ბიუჯეტი თბილისის მუნიციპალიტეტს არასდროს ჰქონია. ის 2022 წლის ბიუჯეტზე 326 მლნ ლარით მეტია, – ამის შესახებ თბილისის მერმა, კახა კალაძემ მუნიციპალიტეტის მთავრობის სხდომაზე ისაუბრა.
მისივე თქმით, მომდევნო წელს, მუნიციპალიტეტი საერთაშორისო დონორი ორგანიზაციებისგან მოზიდული სახსრებით ჯამურად 166 მლნ ლარის ღირებულების პროექტებს განახორციელებს.
„მნიშვნელოვანია, რომ აღნიშნული ბიუჯეტის ფარგლებში 515 მლნ ლარის გამოყოფა, გარემოს დაცვის მიმართულებით – 200 მლნ ლარის, ჯანდაცვის და სოციალური უზრუნველყოფის მიმართულებით – 500 მლნ ლარის, ბინათმესაკუთრეთა ამხანაგობების განვითარებისთვის – 39 მლნ ლარი; ავარიული სახლების ჩანაცვლებისა და გამაგრების პროგრამა კვლავ გრძელდება და ჯამურად ამისთვის გამოყოფილია 31 მლნ ლარი.
აღნიშნული ბიუჯეტის ფარგლებში მუნიციპალიტეტი ოფიციალურად დაიწყებს ავტობუსების და ავტობაზის პროექტს, რომლისთვისაც 60 მლნ ლარია გამოყოფილი და მრავალწლიანი შესყიდვის სახით განხორციელდება. დაიწყება 18-მეტრიანი ავტობუსების შესყიდვა და ავტობაზის პროექტის განხორციელება.
გარდა ამისა, განხორციელდება წერეთლის გამზირის რეაბილიტაცია, რომლისთვისაც 25 მლნ ლარია გამოყოფილი, ასევე, დიდუბის ხიდის, უნივერსიტეტის ქუჩის, მშვიდობის ხიდის, სულხან-საბას და ინგოროყვას ქუჩების რეაბილიტაცია;
ასევე რეაბილიტირდება წინამძღვრიშვილის N1-ში მდებარე საცხოვრებელი სახლი; სრულად განახლდება ვაზისუბანში და დიღმის მასივში არსებული პარკების, ასევე, ციციშვილის პარკის რეაბილიტაცია, ასევე, მუხიანში გრძელი პარკის, პირველი რესპუბლიკის პარკის, ე.წ. სამხედრო ქალაქის მიმდებარედ გაშენდება დიდი პარკი.
განხორციელდება ნარჩენების მართვის მიმართულებით სხვადასხვა ღონისძიებები, მათ შორის, მეოთხე უჯრედის მშენებლობის სამუშაოები – ესეც მრავალწლიანი შესყიდვა იქნება და მომავალ წელს ამისთვის გამოყოფილია 3 მლნ ლარი; გარდა ამისა, „თბილსერვის ჯგუფისთვის“ გამოყოფილია 9 მლნ ლარი, რომლითაც შეისყიდიან 15 მარილმყრელს, 7 ამწეს და 5 ექსკავატორს შესყიდვა.
კახეთის გზატკეცილზე განხორციელდება მიწისქვეშა გადასასვლელების რეაბილიტაცია. რასაკვირველია, ყველაფერს ვერ ჩამოვთვლი, მაგრამ უნდა აღინიშნოს, რომ ბევრი კარგი პროექტი იგეგმება, რომლის განხორციელება პირდაპირ აისახება თბილისის მოსახლეობის ცხოვრების ხარისხზე და კეთილდღეობაზე“, – განაცხადა კახა კალაძემ.