საქართველოს პრემიერ-მინისტრმა, ირაკლი ღარიბაშვილმა და შინაგან საქმეთა მინისტრმა, ვახტანგ გომელაურმა შეიარაღებული თავდასხმის შედეგად დაღუპული პოლიციელის, ოთარ ღვინაშვილის ოჯახს მიუსამძიმრეს.
სამსახურებრივი მოვალეობის შესრულების დროს დაღუპულ პოლიციის უფროსი ლეიტენანტის ხსოვნას პატივი მიაგეს იუსტიციის მინისტრმა – რატი ბრეგაძემ, თავდაცვის მინისტრმა – ჯუანშერ ბურჭულაძემ და აჭარის მთავრობის თავმჯდომარემ – თორნიკე რიჟვაძემ.
20 იანვრის ღამეს, საგარეჯოში მომხდარი თავდასხმის დროს დაღუპული პოლიციელის, უფროსი დეტექტივის – ოთარ ღვინაშვილის სამოქალაქო პანაშვიდები თბილისში, წმინდა ვახტანგ გორგასლის ტაძარში მიმდინარეობს.
დილიდან გარდაცვლილი კოლეგის სამოქალაქო პანაშვიდზე მიდიან პოლიციელები, შინაგან საქმეთა სამინისტროს დანაყოფების თანამშრომლები და სხვადასხვა უწყების წარმომადგენლები.
შინაგან საქმეთა სამინისტროს კახეთის პოლიციის დეპარტამენტის საგარეჯოს რაიონული სამმართველოს უფროს დეტექტივს, პოლიციის უფროს ლეიტენანტს – ოთარ ღვინაშვილს ხვალ, 24 იანვარს მშობლიურ სოფელში – პატარა ჩაილურში სამხედრო პატივით დაკრძალავენ.
