დღეს უპილოტო საფრენი აპარატების სატესტო ფრენები განვახორციელეთ, აპრილში კი ამ აპარატების მასობრივ წარმოებას დავიწყებთ, – ამის შესახებ თავდაცვის მინისტრმა, ჯუანშერ ბურჭულაძემ განაცხადა.
„საქართველოში ჩვენ უპილოტო საფრენი აპარატების წარმოებას ვიწყებთ. დღეს ვიხილეთ ორი სახის საფრენი აპარატი; ერთი არის სადაზვერვო – FLYEYE და მეორე კამიკაძის ტიპის საფრენი საშუალება. დღეს ჩვენ სატესტო ფრენები განვახორციელეთ და აპრილში დავიწყებთ მასობრივ წარმოებას. დღეს გამოფენილი გვაქვს ის სადაზვერვო თუ სხვა საშუალებები, რომელიც თავდაცვის ძალებმა მიიღო 2022 წლის განმავლობაში. ასევე, მინდა აღვნიშნო, რომ 2022 წლის ბოლოს და 2023 წლის დასაწყისში ჩვენ დავდეთ შეიარაღების საშუალებების შესყიდვის ძალიან მნიშვნელოვანი ხელშეკრულებები“, – აღნიშნა ბურჭულაძემ.
საქართველოს პრემიერ-მინისტრი ირაკლი ღარიბაშვილი ქართულ-პოლონური საწარმოს – შპს „დელტა-ვებეს“ მიერ WARMATE-ისა (კამიკაძე) და FLYEYE-ის სადაზვერვო ტიპის უპილოტო საფრენი აპარატების სადემონსტრაციო ფრენას მხარდამჭერი ცენტრის – “კრწანისის” სასროლეთზე, თავდაცვის მინისტრთან ჯუანშერ ბურჭულაძესთან, შინაგან საქმეთა მინისტრთან ვახტანგ გომელაურთან და თავდაცვის ძალების წარმომადგენლებთან ერთად დაესწრო.