დანაშაულები, რომელიც მერაბიშვილმა ჩაიდინა მას არ აძლევს არანაირ მორალურ უფლებას, რომ იყოს აქტიურ პოლიტიკაში,- ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან განაცხადა.
მისივე თქმით, „მნიშვნელოვანია დავაკვირდეთ, რამდენად გაემიჯნებიან მერაბიშვილს „ნაციონალური მოძრაობის“ აქტიური მხარდამჭერები ქვეყნის შიგნით თუ გარეთ და შევხედოთ რა მორალურ პრინციპებზე დგანან ის მხარდამჭერები, რომლებსაც ჩვენ ხშირად ვხედავთ ხოლმე „ნაციონალური მოძრაობის“ გვერდით“.
„ჩვენ დიდი ხანი ვსაუბრობდით ოლიგარქიულ არაფორმალურ მმართველობაზე „ნაციონალურ მოძრაობაში“. ამას უკვე თავადაც ადასტურებენ და ვხედავთ რეალურად ვინ მართავს პროცესებს „ნაციონალურ მოძრაობაში“. თავად ვანო მერაბიშვილის აქტიურ პოლიტიკაში ასე გამოჩენის პროცესს, ვფიქრობ, მნიშვნელოვანია დავაკვირდეთ, თუ ვინ მიიღებს მას პოლიტიკაში და მათ შორის, „ნაციონალური მოძრაობის“ უცხოელი მხარდამჭერებისგან როგორი რეაქცია იქნება ამაზე. ვანო მერაბიშვილმა, რომელმაც დადასტურებულად ჩაიდინა რამდენიმე დანაშაული, თუ არ ვცდები იგი გასამართლებული იყო რამდენიმე საქმეზე, სანდრო გირგვლიანის, 26 მაისის დემონსტრაციის დარბევის საქმეზე, ანუ საკითხებზე, რომელიც ეხება მართლმსაჯულებისთვის ხელის შეშლას და მოძალადეების მართლმსაჯულებისგან დახსნას, ასევე, ავტორიტარული რეჟიმის პირდაპირ შექმნას. ეს ადამიანი ცდილობს კვლავ დაიმკვიდროს თავი პოლიტიკაში. მან მართალია კანონის წინაშე სასჯელი მოიხადა, თუმცა, დანაშაულს აქვს როგორც სამართლებრივი, ასევე მორალური განზომილება და ის დანაშაულები, რომელიც მან ჩაიდინა, მას არ აძლევს არანაირ მორალურ უფლებას, რომ იყოს აქტიურ პოლიტიკაში. ახლა მნიშვნელოვანია დავაკვირდეთ, რამდენად გაემიჯნებიან მას „ნაციონალური მოძრაობის“ აქტიური მხარდამჭერები ქვეყნის შიგნით თუ გარეთ. შევხედოთ რა მორალურ პრინციპებზე დგანან ის მხარდამჭერები, რომლებსაც ჩვენ ხშირად ვხედავთ ხოლმე „ნაციონალური მოძრაობის“ გვერდით, ვგულისხმობ მათ უცხოელ ლობისტებსა და მხარდამჭერებს“, – აღნიშნა პაპუაშვილმა.