სიმონ დადიანის ხუთი ნამუშევარი, რომელიც პრეზიდენტის ორბელიანების სასახლეში ინახებოდა, ხელოვნების სასახლეს დაუბრუნდა. მიზეზი ერთ-ერთი ტილოს დაზიანებაა. პროცესში ჩართულია კულტურის სამინისტროს გენერალური ინსპექცია.
როგორც საქართველოს კულტურის, სპორტისა და ახალგაზრდულ საქმეთა სამინისტროს გენერალური ინსპექციის უფროსის მოადგილე კახაბერ ჭუმბაძემ განაცხადა, 2020 წელს, პრეზიდენტის ადმინისტრაციის თხოვნით, ხელოვნების სასახლიდან ადმინისტრაციისთვის გადაცემული იქნა ხუთი ნახატი დროებითი გამოფენისთვის. მისივე თქმით, ორი წელი იყო ვადა, რომელიც 2022 წლის დეკემბერში ამოიწურა.
როგორც გენერალური ინსპექციის უფროსის მოადგილე განმარტავს, წლის დასაწყისში, ხელოვნების სასახლის წარმომადგენლებმა, წესების მიხედვით, მოახდინეს ნახატების მონიტორინგი და აღმოჩნდა, რომ ერთი ნახატი არის დაზიანებული.
„დღეს ჩვეულებრივი პროცედურა იყო გამომდინარე სამუზეუმო ექსპონატების დაცვა-აღრიცხვის მოქმედი ინსტრუქციით გათვალისწინებული წესების მიხედვით. 2020 წელში პრეზიდენტის ადმინისტრაციის თხოვნით, ხელოვნების სასახლიდან ადმინისტრაციისთვის გადაცემული იქნა ხუთი ნახატი დროებითი გამოფენისთვის. გაფორმდა შესაბამისი ბრძანება, გაფორმდა შესაბამისი მიღება-ჩაბარების აქტი. ამ ორი დოკუმენტით განისაზღვრა ის ვადა, რომელიც გადმოცემული იყო პრეზიდენტის ადმინისტრაციის გადმოცემისთვის. ორი წელი იყო ის ვადა, რომელიც ამოიწურა 2022 წლის დეკემბრის თვეში. შემდგომ, ამ მოქმედი ინსტრუქციის თანახმად, უნდა მომხდარიყო ან ვადის გაგრძელება, ან ამ ნახატების უკან დაბრუნება. ეს ყველაფერი გაწერილია ინსტრუქციაში. სხვათა შორის, მიღება-ჩაბარების აქტში, რომელსაც ხელს აწერს ადმინისტრაციის წარმომადგენელიც, როცა გადმოეცათ მათ ნახატები, იქ წერია, რომ ვადის ამოწურვისთანავე დაუყოვნებლივ უნდა მოხდეს ნახატების დაბრუნება. ამ წლის დასაწყისში პრეზიდენტის ადმინისტრაციიდან შემოსული იქნა წერილი ვადის გაგრძელებასთან დაკავშირებით. ხელოვნების სასახლის წარმომადგენლები მოვიდნენ, გათვალისწინებული წესების მიხედვით და მოახდინეს მონიტორინგი ამ ნახატების, ანუ მათი დაცულობა იქნა შესწავლილი. აღმოჩნდა, რომ ერთი ნახატი არის დაზიანებული, ნახევის სახით აქვს დაზიანება, ხოლო ორს აღენიშნებოდა ანაქერცლი. ისევ და ისევ წესების მიხედვით, აღნიშნული ითვალისწინებს ამ ნახატების დაბრუნებას სამუზეუმო სივრცეში და მისთვის რესტავრაციის ჩატარებას.
ამ მიზნით უკვე გახლდით ერთხელ მოსულები პრეზიდენტის ადმინისტრაციაში, თუ არ ვცდები, გასული კვირის პარასკევი დღე იყო, მაგრამ გაურკვეველი ახსნა-განმარტებები მივიღეთ და ხელი შეგვეშალა ამ ნახატების იმ დღეს წაღებაში. დღეს კვლავ გამოვცხადდით. კვლავ ავუხსენით ეს წესები შესაბამის პიროვნებებს და ნახატები გადმოგვეცა. ვერ გავიგე მათი ახსნა მაშინ, მართალი გითხარით. განმარტება მიეცათ, რომ ნახატები დასაბრუნებელია, რომ ვადა აღარ არსებობს, ან ნახატების აქ ყოფნის იურიდიული საფუძველი აღარ არსებობს. ჩვენ იძულებული ვართ, დავიცვათ სამუზეუმო ექსპონატები, გართულებას მოვერიდეთ, თუმცა კიდევ ერთხელ კომუნიკაციის დროს ავუხსენით ეს წესები და დღეს წამოვიღეთ“,- განაცხადა კახაბერ ჭუმბაძემ.
კულტურის სამინისტროს გენერალური ინსპექციის უფროსის მოადგილე აცხადებს, რომ 2020 წლის აღწერისას ნამუშევარზე დაზიანება არ ყოფილა.
„მაშინდელი მიღება-ჩაბარების აქტი როცა შედგა, 2020 წელს, იქ აღწერილობა მოცემულია და ნახატი დაზიანებული არ ყოფილა. ახლანდელი მონიტორინგის პერიოდში, როდესაც დეკემბრის თვეში მოხდა ეს მონიტორინგი აღმოჩნდა, რომ ნახატი დაზიანებული იყო. ამიტომ ვალდებული ვართ, ეს ნახატი წავიღოთ. რესტავრაცია მოხდება. რაც შეეხება პასუხისმგებლობას, მიღება-ჩაბარების აქტში გარკვევით წერია, რომ მას შემდეგ, რაც ნახატი ნებისმიერი დაწესებულების შენობაში აღმოჩნდება, მის დაცვაზე, შენახულობაზეპასუხისმგებლობა ეკისრება იმ პიროვნებას, ვინც მიღება-ჩაბარებაზე აწერს ხელს. ხელს აწერს კოტე ნაცვლიშვილი. თუ არ ვცდები, მრჩეველია პრეზიდენტის კულტურის დარგში. კვლევა ჩატარდება, გაირკვევა მიზეზები, შეიძლება, ეს იყოს ბანალური მიზეზი, გადმოტანის დროს, არ ვიცი, რა იქნება, რესტავრატორი ჩაატარებს და ამის შემდეგ იქნება პასუხისმგებლობაზე საუბარი. შევხედავთ, შესაბამისი ექსპერტები გამოიკვლევენ დაზიანების მიზეზს და ამის შემდეგ მოხდება რეაგირება“,- განაცხადა კახაბერ ჭუმბაძემ.