ნებისმიერ შეფასებას სჭირდება არგუმენტები და არა ის, რაც ჩვენი ოპონენტებისგან მოვისმინეთ – რომ ეს არის რუსული ვარიანტი, რომ ეს ცეცხლთან თამაშია, რომ ეს მიუღებელია, – ასე უპასუხა დიმიტრი ხუნდაძემ „ქრონიკაში“ „ხალხის ძალის“ კანონპროექტის „უცხოური გავლენის გამჭვირვალობის შესახებ“ კრიტიკას.
„შემახსენეთ, რომელმა ოპონენტმა რომელი არგუმენტი დაასახელა თუნდაც შეშფოთებისთვის, თუნდაც რუსულობისთვის, თუნდაც მიუღებლობისთვის. აქ არის მხოლოდ სპეკულაციური ჟესტიკულაციები და სპეკულაციური სიტყვათაწყობა, რომ მხოლოდ და მხოლოდ შეურაცხმყოფელ იყოს. ჩემი ეჭვია, რომ ამაზე გაამახვილეს ყურადღება იმ სუბიექტებმა, ვინც რაღაც ნაწილში საკუთარი თავი ამოიცნო ალბათ“, – განაცხადა ხუნდაძემ.
14 თებერვალს „ხალხის ძალამ“ საქართველოს პარლამენტში „უცხოური გავლენის გამჭვირვალობის შესახებ“ კანონპროექტი დააინიცირა. ამერიკის სახელმწიფო დეპარტამენტის სპიკერმა, ნედ პრაისმა პარლამენტში წარდგენილი კანონპროექტი დაიწუნა და მასში გარკვეული საფრთხე დაინახა.