საქართველოს საგარეო საქმეთა მინისტრმა მიუნხენში, საქართველოს პრემიერ-მინისტრის, ირაკლი ღარიბაშვილის უსაფრთხოების კონფერენციის ფარგლებში გამართულ თემატურ პანელურ დისკუსიაზე გამოსვლა შეაფასა. ილია დარჩიაშვილმა აღნიშნა, რომ ეს დისკუსია შეფასდა, როგორც ისტორიული.
„დისკუსია შეფასდა როგორც ისტორიული, რადგან პირველად მოხდა, რომ მსგავსი ტიპის განხილვებში სამხრეთ კავკასიის სამი ქვეყნის ლიდერი მონაწილეობდა. ამას აქვს თავისი დატვირთვა. ეს განხილვა შექმნის ახალ სივრცეებს, რათა ეს დიალოგი გაგრძელდეს და მივაღწიოთ მთავარ მიზანს – დამყარდეს მშვიდობა, შეთანხმდეს ჩვენი 2 სამხრეთელი ქვეყანა მშვიდობაზე, მათ ხელი მოაწერონ შეთანხმებას და უზრუნველყოფილი იყოს ჩვენი რეგიონის უსაფრთხოება, განმტკიცდეს მშვიდობა. ეს მნიშვნელოვანია რეგიონის განვითარებისთვის. ვფიქრობ, ნამდვილად გამოვიდა ისტორიული განხილვა და დისკუსიების გასაგრძელებლად შექმნის ახალ სივრცეებს“, – აღნიშნა ილია დარჩიაშვილმა.
მიუნხენში, უსაფრთხოების კონფერენციის ფარგლებში პანელი „მოძრავი მთები – უსაფრთხოების მშენებლობა სამხრეთ კავკასიაში“ გაიმართა. პანელში მონაწილეობდნენ საქართველოს პრემიერ-მინისტრი ირაკლი ღარიბაშვილი, აზერბაიჯანის პრეზიდენტი ილჰამ ალიევი, სომხეთის პრემიერ-მინისტრი ნიკოლ ფაშინიანი.