„სამწუხაროდ, ბოლო ხნის ქართული პოლიტიკა იქცა პოლიტიკად ძალაუფლებისთვის. ძალაუფლებისთვის პოლიტიკამ გადაფარა ქვეყნის განვითარების გრძელვადიანი ამოცანები და პრიორიტეტები“, – ამის შესახებ ყოფილი პრემიერ-მინისტრის, ბიძინა ივანიშვილის ადვოკატმა, იურისტმა ვიქტორ ყიფიანმა განაცხადა და მმართველი გუნდი ე.წ გავლენის აგენტების შესახებ ინიცირებისთვის გააკრიტიკა.
როგორც ყოფიანმა რადიო „იმედის“ ეთერში აღნიშნა, „ქვეყნის რეპუტაციული სიჯანსაღე არის მნიშვნელოვანი და პოლიტიკოსებმა უნდა შეძლონ პარტიული და ქვეყნის მიზნების გამიჯვნა“:
„ჩვენ არ ვიცოდით, რომ ამ პროცესის წამოწყებას ასეთი ოფიციალური, მწვავე რეაქცია მოჰყვებოდა როგორც ქვეყნის შიგნით, ისე გარეთ.
ჩვენ ამაზე ხომ ვიღებდით არაერთ განცხადებას? ყოველ შემთხვევაში, იმ საერთაშორისო ინსტიტუტებისგან, რომელთა მიმართულებით სვლა ჩვენი ოფიციალური, დეკლარირებული არჩევანია.
სამწუხაროდ, ბოლო ხნის ქართული პოლიტიკა იქცა პოლიტიკად ძალაუფლებისთვის. ძალაუფლებისთვის პოლიტიკამ გადაფარა ქვეყნის განვითარების გრძელვადიანი ამოცანები და პრიორიტეტები“, – განაცხადა ვიქტორ ყიფიანმა.
მანვე აღნიშნა, რომ აღნიშნული კანონპროექტი, სამართლებრივი კუთხით პრობლემას არ ქმნიდა და არავის „არ ზღუდავდა.“ ექსპრემიერის უფლებადამცველის შეფასებით, კონტექსტი უკეთ უნდა აეხსნათ როგორც დასავლელი პარტნიორებისთვის, ისე – მოსახლეობისთვის.
„რას ემსახურებოდა კანონპროექტის ინიცირება? თუ ამ კანონპროექტით არანაირი საგნობრივი, ხელშესახები შედეგი არ მიიღწევა, მით უმეტეს, რატომ იყო აუცილებელი ამ კანონპროექტის ინიცირებით ამ ვნებათაღელვის გამოწვევა?
თუ საუბარია გამჭვირვალობის ხარისხის ზრდაზე, ამის მიღწევა შეიძლებოდა დამატებითი მექანიზმებით არსებულ კანონმდებლობაში, ვთქვათ, გარკვეული დამატებებისა და გარკვეული ცვლილებების შეტანის გზით.
ახლა, ამ ვითარებაში, როდესაც ცალკე კანონპროექტის შემუშავება, მით უმეტეს, იმ ფონზე, როდესაც ჩვენ არაერთგზის გაფრთხილება მივიღეთ პარტნიორების მხრიდან, რომ ეს დააზიანებდა იმ პროცესს, რასაც პოლიტიკური ევროპისკენ სვლა ჰქვია, მოტივაცია, კონტექსტი, რეალურად რას ისახავდა ეს პოლიტიკური პრიორიტეტების კუთხით, თუ რაიმე არის რაც ჩვენ არ ვიცით, მაშინ ეს უკეთ უნდა აეხსნათ“, – აღნიშნა ვიქტორ ყიფიანმა.