ნებისმიერი სახის ურთიერთობა, განსაკუთრებით სტრატეგიულ პარტნიორებს შორის ურთიერთობა უნდა ემყარებოდეს ურთიერთპატივისცემის, სახელმწიფოებრიობის, სუვერენიტეტის დაცვის პრინციპს და, რაც ყველაზე მთავარია, ის უნდა ემყარებოდეს სამართლიანობის პრინციპს, – ამის შესახებ „ქრონიკის“ ეთერში საპარლამენტო უმრავლესობის წევრმა, დავით მათიკაშვილმა განაცხადა.
„ის მიმართულება და სეგმენტი, სადაც პარტნიორულ ურთიერთობებში სამართლიანობის საკითხი დადგება კითხვის ქვეშ, ნამდვილად არ შეუწყობს ხელს სტრატეგიული პარტნიორობის კიდევ უფრო მეტად გაღრმავებას და ეს არის ამ ურთიერთობებისთვის ძალიან ცუდი. ჩვენ გამოვთქვამთ იმედს, რომ საგარეო საქმეთა სამინისტროს და უზენაესი სასამართლოს თავმჯდომარის კონკრეტულ გზავნილებზე საპასუხოდ ან წარმოდგენილი იქნება მტკიცებულებები, ან გადაიხედება ეს გადაწყვეტილება და უსამართლოდ განხორციელებული ქმედება უკან იქნება წაღებული. ეს იქნება ყველაზე სწორი ამ ვითარებაში“, – ამბობს დავით მათიკაშვილი.