ოპოზიციის წარმომადგენლების მოთხოვნას, რომ დაინიშნოს რიგგარეშე სესია და საგამოძიებო კომისიამ შეისწავლოს სასამართლო სისტემაში არსებული ხარვეზები, უმრავლესობაში ეხმაურებიან.
მმართველი გუნდი ამ ეტაპზე საგამოძიებო კომისიის შექმნის იდეას არ იზიარებს და ამბობს, რომ თუ ამის საჭიროებას დაინახავენ, მას თავადვე შექმნიან.
პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის თქმით, პარლამენტი არ არის ის ადგილი, რომელმაც სასამართლო ხელისუფლების კონკრეტული თანამდებობის პირების ქმედებათა კანონიერებაზე იმსჯელოს.
“რაც შეეხება საკითხს იმის შესახებ, რომ საგამოძიებო კომისია ჩამოყალიბდეს, მე სიმართლე გითხრათ, ეს აზრი არ მომწონს. ერთმნიშვნელოვნად შემიძლია ვთქვა ამასთან დაკავშირებით, რომ პარლამენტი არ არის ის ადგილი, რომელმაც სასამართლო ხელისუფლების კონკრეტული თანამდებობის პირების ქმედებათა კანონიერებაზე უნდა იმსჯელოს და შესაბამისი რეაგირება მოახდინოს. იმიტომ რომ ეს ცალსახად შემიძლია ვთქვა, რომ დააკნინებს სასამართლო ხელისუფლების დამოუკიდებლობის პრინციპს. ობიექტურად უნდა დავამატოთ, რომ არც ამ მიმდინარე საკომიტეტო კვირაში რიგ გარეშე სხდომის ჩანიშვნის საჭიროება უნდა არსებობდეს,” – აცხადებს მიხეილ სარჯველაძე.