საავტომობილო გზების დეპარტამენტი თბილისი-ბათუმის ავტობანთან დაკავშირებით განცხადებას ავრცელებს.
მათივე ინფორმაციით, სამუშაოების დასრულებამდე, დროებით, სატრანსპორტო საშუალებების მოძრაობა სამტრედია-ლანჩხუთი-გრიგოლეთის საავტომობილო გზის ძველი მიმართულებით, ლანჩხუთი-ჯაპანას მონაკვეთზე გადაერთო, საიდანაც ავტოტრანსპორტის მოძრაობა შეუფერხებლად მიმდინარეობს.
„გვსურს გამოვეხმაუროთ „ტელეკომპანია პირველის“ მორიგ ტყუილს თბილისი-ბათუმის ავტობანის პარალიზების შესახებ და საზოგადოებას მივაწოდოთ სრული და სწორი ინფორმაცია.
ქალაქ ლანჩხუთში, აღმაშენებლის ქუჩაზე გამავალი, ავტობანთან მისასვლელი გზის 1,5 კმ-იან მონაკვეთზე მიმდინარეობს ზამთრის პერიოდის შემდგომ გაჩენილი ორმოულების შეკეთების და გზაზე არსებული ჭის თავების გამოცვლა-გასწორების სამუშაოები, რის შესახებაც ინფორმაცია საჯაროდ ხელმისაწვდომი იყო,
სამუშაოები მიმდინარეობს მოვლა-შენახვის ხელშეკრულების ფარგლებში და სრულდება ხვალ, 14 აპრილს.
სამუშაოების დასრულებამდე, დროებით, სატრანსპორტო საშუალებების მოძრაობა გადაერთო სამტრედია-ლანჩხუთი-გრიგოლეთის საავტომობილო გზის ძველი მიმართულებით, ლანჩხუთი-ჯაპანას მონაკვეთზე, საიდანაც ავტოტრანსპორტის მოძრაობა შეუფერხებლად მიმდინარეობს. აღნიშნული შეზღუდვა იმოქმედებს 14 აპრილის დღის ბოლომდე.
რაც შეეხება, მისაბმელიანი და ნახევრადმისაბმელიანი ავტოტრანსპორტის გადაადგილების შეზღუდვას, ის გამოწვეულია რიკოთის საუღელტეხილო მონაკვეთზე დაწესებული შეზღუდვით, რომლის მიხედვითაც: მისაბმელიანი, ნახევრადმისაბმელიანი ავტოტრანსპორტის და სატვირთო ავტომობილების მოძრაობა დასაშვებია 21:00 სთ-დან 06:00 სთ-მდე, რევერსულად.
შესაბამისად, ტელეკომპანიის მიერ მომზადებული სიუჟეტი არის აგებული ტყუილზე, დამახინჯებულ ფაქტებზე, არასრულ ინფორმაციაზე და ემსახურება საკუთარი მაყურებლის შეცდომაში შეყვანას სახელმწიფო უწყებების დისკრედიტაციის მიზნით“, – ნათქვამია გავრცელებულ ინფორმაციაში.