ცინიზმის მწვერვალია და ქართული საზოგადოების შეურაცხყოფა, როდესაც ის [დავით კეზერაშვილი] თურმე რაღაც წილებს გადასცემს კოლექტივს, მაგრამ ნაწილს მაინც იტოვებს. მან ჯერ გაძარცვა ქართული ჯარი და ამით აფინანსებდა სხვადასხვა ანტისახელმწიფოებრივ პოლიტიკურ აქტივობას საქართველოში, ახლა კი წილებს იმიტომ იტოვებს, რომ გაძარცვული ევროპელი პენსიონერების ფული დააბრუნოს საქართველოში, – ამის შესახებ განათლების და მეცნიერების მინისტრმა, გიორგი ამილახვარმა განაცხადა, რითაც გამოეხმაურა დავით კეზერაშვილის განცხადებას, რომლის თანახმადაც ის უარს ამბობს „ფორმულას“ საკონტროლო პაკეტზე და არსებული წილის ნახევარს ტელეკომპანიის კოლექტივს გადასცემს.
„სამწუხარო რეალობა გვაქვს საქართველოში, როდესაც ოპოზიციურად განწყობილი მედიის დიდ ნაწილს და ოპოზიციური პარტიების დესტრუქციულ ნაწილს კეზერაშვილი აფინანსებს, რომელმაც თავის დროზე ქვეყნის სიამაყეს, ჯარს მოჰპარა ფული და ამით აფინანსებდა ყველაფერს.
ევროპელი პენსიონერები გაძარცვა და პარტიებს, ტელევიზიას ამით აფინანსებს. ეს არის ამ ადამიანის რეალური სახე. ვფიქრობ, საზოგადოება ნათლად ხედავს და გააკეთებს დასკვნებს, რომ ის ადამიანები, ვინც ფულს იღებენ კეზერაშვილისგან, იმ გზის გამგრძელებლები არიან, რომელსაც დიდი ხანია დაადგა დავით კეზერაშვილი“, – აღნიშნავს ამილახვარი.
დავით კეზერაშვილის განცხადებით, ის უარს ამბობა „ფორმულას“ საკონტროლო პაკეტზე და არსებული წილის ნახევარს ტელეკომპანიის კოლექტივს გადასცემს.