ეს ადამიანები პარლამენტს მეათე მოწვევის პარლამენტის საქმიანობის დაწყებისას საკონსტიტუციო სასამართლოში უჩიოდნენ, რადგან ჩვენ მათ მანდატი არ შევუჩერეთ, დრომ აჩვენა, რომ მაშინდელი მათი პოზიცია იყო უნიათობის გამოვლინება და ჩვენ სწორი გადაწყვეტილება მივიღეთ, – ამის შესახებ „ქართული ოცნების“ წევრმა, რატი იონათამიშვილმა განაცხადა.
იონათამიშვილის თქმით, საპარლამენტო უმრავლესობის მხრიდან რეგლამენტის ყველა ნორმა დაცული იყო.
„როგორც ჩანს, ახლა ისინი ისევ იმავე წრეზე აპირებენ სიარულს, რაშიც ცუდი არაფერია, რადგან საზოგადოება კიდევ ერთხელ დაინახავს როგორც მათ არაკომპეტენტურობას, ასევე უნიათობას. ჩვენი მხრიდან რეგლამენტის ყველა ნორმა დაცული იყო. „ნაციონალურ მოძრაობას“ დროებითი საგამოძიებო კომისია არ უნდოდა საქმისთვის, უნდოდა მხოლოდ შოუს მოსაწყობად. ეს იყო მათი მხრიდან ერთგვარი შურისძიება იმაზე, რომ მათ დაკარგეს კონტროლი სასამართლოზე და ამას ვერ ეგუებიან. მათ მასკარადების მოწყობის შესაძლებლობას არ მივცემთ. პარლამენტში მუშაობა არის მაღალი პასუხისმგებლობა და ვისაც ეს არ ესმის, მოუწევს უნიათო მდგომარეობაში ყოფნა, რაშიც ახლა არიან“, – განაცხადა იონათამიშვილმა.