რადიკალებს საგამოძიებო კომისიის შექმნა სჭირდებათ იმისთვის, რომ გაიგონ რა არგუმენტები აქვთ საერთაშორისო გამოძიებას და ჩვენს ძალოვან სტრუქტურებს, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.
„ბატონ გახარიას კუდი აეწვა იმიტომ, რომ შინაგან საქმეთა მინისტრი, პრემიერ-მინისტრი იყო და ესე იგი თუ რამე ხდებოდა თვითონ არ იცოდა?! ამას ამტკიცებს? არა! მათ სჭირდებათ, რომ ასეთი რადიკალების მიერ საგამოძიებო კომისია შეიქმნას, გაიგონ რა არგუმენტები აქვთ იმ საერთაშორისო გამოძიებას და ჩვენს ძალოვან სტრუქტურებს, რომლებიც თანამშრომლობენ საერთაშორისო გამოძიებასთან და ამით წინასწარ გახდეს ცნობილი, რომ მერე თავი დაიცვას საერთაშორისო სასამართლოში“, – აღნიშნა ზარქუამ.
ე.წ. ქოლცენტრების საქმეზე საგამოძიებო კომისიის შექმნას გიორგი გახარია ეხმაურება. პარტია „საქართველოსთვის“ ლიდერი „ქართულ ოცნებას“ და „ნაციონალურ მოძრაობას“ აკრიტიკებს და საუბრობს იმაზე, თუ რატომ არ უნდა „ქართულ ოცნებას“ ამ საქმეზე კომისიის შექმნა. გახარიას თქმით, ყოფილი თავდაცვის მინისტრი და ოპოზიციური პარტიის ლიდერი ევროპელ პენსიონერებს თაღლითურად ფულს ჰპარავს, რომელსაც ოფიციალური პირები ან ხელს აფარებდნენ, ან თვითონაც „თაღლითურად იპარავდნენ“.