საპარლამენტო უმრავლესობის წევრის, ირაკლი ქადაგიშვილის განცხადებით, პარტია „საქართველოსთვის“ ლიდერის, გიორგი გახარიას განცხადებები ე.წ. ქოლცენტრების საქმეზე არის კლასიკური ნიმუში იმისა, თუ როგორ შეიძლება ადამიანმა ყოველგვარი ლოგიკისა და მტკიცებულების გარეშე ვიღაცას ტალახი ესროლოს და შეურაცხყოფა მიაყენოს.
„ასეთი უსაფუძვლო განცხადებები, სადაც გახარია ცდილობს, რამენაირად დააკავშიროს „ქართული ოცნება“ იმ საქმიანობასთან, რასაც „ნაცმოძრაობასთან“ აფილირებული ძალები ეწევიან, არის მცდელობა, რომ რამენაირად ჩამოსცილდეს იმ წარსულს, რომელიც ღალატის შემდეგ „ნაცმოძრაობასთან“ მის თანამშრომლობაში გამოიხატება, და თავი წარმოაჩინოს, როგორც დამოუკიდებელმა მესამე ძალამ“, – აცხადებს ქადაგიშვილი.
ე.წ. ქოლცენტრების საქმეზე საგამოძიებო კომისიის შექმნას გიორგი გახარია ეხმაურება. პარტია „საქართველოსთვის“ ლიდერი „ქართულ ოცნებას“ და „ნაციონლაურ მოძრაობას“ აკრიტიკებს და საუბრობს იმაზე, თუ რატომ არ უნდა „ქართულ ოცნებას“ ამ საქმეზე კომისიის შექმნა. გახარიას თქმით, ყოფილი თავდაცვის მინისტრი და ოპოზიციური პარტიის ლიდერი ევროპელ პენსიონერებს თაღლითურად ფულს ჰპარავს, რომელსაც ოფიციალური პირები ან ხელს აფარებდნენ, ან თვითონაც „თაღლითურად იპარავდნენ“.