„ვიდრე კოლეგები არ იტყვიან, რა უნდათ პოლიტიკაში, რას შეცვლიან, მათი არ მჯერა“, – ასე გამოეხმაურა “გირჩის” დეპუტატი, იაგო ხვიჩია ინფორმაციას, რომ საპროტესტო აქციებთან დაკავშირებით სამოქალაქო ჯგუფებსა და პარტიებს კონსულტაციები აქვთ.
„ჩვენ არ გვაქვს კოორდინაცია, სამწუხაროდ, არ ვუყვარვართ ჩვენს კოლეგებს, მოგეხსენებათ. მაგრამ, ამის მიუხედავად, მიგვაჩნია, რომ არათუ აქციებია საჭირო, არამედ ხელისუფლების ცვლილებაც კია საჭირო. ყოველდღიურად მოვუწოდებთ კოლეგებს, იფიქრონ იმაზე, რომ ჩამოაყალიბონ ქვეყნის განვითარების ხედვა იმ შემთხვევისთვის, თუ “ქოცები” არ იქნებიან ხელისუფლებაში.
სანამ ამას არ ჩამოაყალიბებენ და ჩემი ძვირფასი კოლეგები არ იტყვიან, რა უნდათ პოლიტიკაში, რისთვის მოვიდნენ, რაზე ოცნებობენ, მანამ მე არცერთი მათი სიტყვის არ მჯერა, სანამ ხალხს ამას არ გაუმხელენ თვითონ როგორ ქვეყანაზე ოცნებობენ, ამიტომ ეს ყველაფერი უბრალოდ ყოველდღიური პროცესის საწარმოებლად არის და არა რამის შესაცვლელად – როგორ შეიძლება, გულწრფელად რამის შეცვლა გინდოდეს და ხალხს არ ეუბნებოდე, შენ თვითონ რა გინდა, რას შეცვლიდი”, – განაცხადა ხვიჩიამ.