ეს გახლავთ ლიხტენშტაინის სამთავროს საგარეო საქმეთა მინისტრის პირველი ოფიციალური ვიზიტი საქართველოში, რაც წარმოადგენს ისტორიული მნიშვნელობის მოვლენას ჩვენი ორმხრივი ურთიერთობებისთვის. ვთანხმდებით, რომ გვაქვს პოტენციალი ეკონომიკური კავშირების გაღრმავებისთვის. ამისთვის მყარ საფუძველს ქმნის თავისუფალი ვაჭრობის შეთანხმება ევროპის თავისუფალი ვაჭრობის ასოციაციასთან, რომლის წევრიც არის ლიხტენშტაინი, – ამის შესახებ ილია დარჩიაშვილმა ლიხტენშტაინის საგარეო საქმეთა მინისტრთან დომინიკ ჰასლერთან შეხვედრის შემდეგ გამართულ ბრიფინგზე განაცხადა. საქართველოს საგარეო უწყების ხელმძღვანელმა განმარტა რა საკითხებზე ისაუბრა კოლეგასთან.
„ქალბატონი მინისტრი გუშინ ბრძანდებოდა საოკუპაციო ხაზის მოსანახულებლად. ეს ჩვენთვის განსაკუთრებით მნიშვნელოვანია და მადლობა მინდა გადავუხადო მას ჩვენი ქვეყნის ტერიტორიული მთლიანობის, სუვერენიტეტის ძლიერი მხარდაჭერისთვის.
ვისაუბრეთ რეგიონში არსებულ ძალიან რთულ და გამოწვევებით სავსე სიტუაციაზე, თუ როგორ შეიძლება პატარა ქვეყნებმა გააძლიერონ გააძლიერონ თანამშრომლობა, გააძლიერონ ორმხრივი ურთიერთობები, იმისთვის რომ გლობალური უსაფრთხოების გამოწვევების ფონზე შევძლოთ გადავდგათ კონკრეტული ნაბიჯები, რომლებიც მოუტანს მშვიდობასა და უსაფრთხოებას ჩვენს ქვეყნებს.
ასევე ვისაუბრეთ უკრაინაში მიმდინარე მოვლენებზე, რუსეთის სამხედრო აგრესიის შესახებ სუვერენული უკრაინის ტერიტორიაზე. მქონდა შესაძლებლობა მინისტრისთვის გამეზიარებინა თუ როგორ ეხმარება საქართველო უკრაინას ჰუმანიტარული და პოლიტიკური მიმართულებით“, – განაცხადა დარჩიაშვილმა.
ლიხტენშტაინის საგარეო საქმეთა, განათლების და სპორტის მინისტრი საქართველოში შეხვედრებს მართავს.