ნატო-ს გენერალური მდივნის, იენს სტოლტენბერგის განცხადებით, ალიანსის წევრმა ქვეყებმა უკრაინის მხარდაჭერის უდიდესი ნება გამოავლინეს.
სტოლტენბერგის თქმით, სოციოლოგიური გამოკითხვები აჩვენებს, რომ ეს მხარდაჭერა ახლაც ძალიან მტკიცეა, თუმცა ცხადია, ის სხვადასხვა ქვეყანაში სხვადასხვანაირია.
„უკრაინის მიმართ მხარდაჭერა მტკიცეა, რადგან ხალხი უკრაინის მიმართ სოლიდარულია. ტრაგედია იქნება უკრაინისთვის, თუ პუტინი გაიმარჯვებს. ასევე, ხალხი ხვდება ძალიან მარტივ ფაქტს, რომ თუ პუტინი უკრაინაში გაიმარჯვებს, ეს მხოლოდ უკრაინელებისთვის არ იქნება ცუდი, ეს იქნება სახიფათო ჩვენთვისაც, რადგანაც ეს იქნება გზავნილი ყველა ავტორიტარი ლიდერისთვის, რომ როდესაც ისინი არღვევენ საერთაშორისო კანონმდებლობას და იჭრებიან სხვა ქვეყანაში, მაშინ ისინი იღებენ იმას, რაც სურთ. ეს კი, მსოფლიოს უფრო სახიფათოს გახდის და ჩვენ უფრო დაიცველები ვიქნებით. ასე რომ, ჩვენს უსაფრთხოების ინტერესებშია, რომ დავუჭიროთ მხარი უკრაინას“, – განაცხადა სტოლტენბერგმა.
მისივე განმარტებით, ახლა ნატო-ს მოკავშირეები გაცილებით მეტ ფულს აბანდებენ თავდაცვაში. სტოლტენბერგის თქმით, ამას ასახავს ის ანგარიში, რომელიც რამდენიმე დღის წინ გამოქვეყნდა და რომლის მიხედვითაც, ევროპასა და კანადაში თავდაცვის ხაჯების ზრდა 8,3 პროცენტს შეადგენს.
იენს სტოლტენბერგის განცხადებით, ნატო-ს სამიტიდან მთავარი მკაფიო მესიჯი იქნება, რომ ალიანსი მხარს უჭერს უკრაინას და შეინარჩუნებს ამ მხარდაჭერას.
„ომი თავისი ბუნებით არაპროგნოზირებადია, ომი გრძელდება იმაზე დიდხანს, ვიდრე ჩვენ ამას ველით, მაგრამ ჩვენი ერთადერთი პასუხი არის, რომ ვდგავართ უკრაინის გვერდით, რამდენი ხანიც მას ეს დასჭირდება. ჩვენ შევინარჩუნებთ ჩვენს მხარდაჭერას, ეს იქნება მკაფიო მესიჯი ამ სამიტიდან, ეს იყო მკაფიო მესიჯი ნატოსგან და პარტნიორი ქვეყნებისგან ომის დაწყების დღიდან“, – აღნიშნა სტოლტენბერგმა.
ნატო-ს გენერალური მდივნის თქმით, რუსეთის თავდაცვის ძალებისგან ძლიერი წინააღმდეგობის მიუხედავად, უკრაინის მხრიდან კონტრშეტევა კრიტიკულად მნიშვნელოვანია.
„ჩვენ უნდა გვახსოვდეს, რომ ომი დაიწყო 2014 წელს, რაც ჩვენ ვნახეთ გასული წლის თებერვალში, იყო სრულმასშტაბიანი შეჭრა, ალიანსი მხარს უჭერს უკრაინას 2014 წლიდან. უკრაინის მხრიდან კონტრშეტევა კრიტიკულად მნიშვნელოვანია, უკრაინელები იბრუნებენ თავიანთ მიწას, უკან წევენ რუს ოკუპანტებს, თუმცა ისინი აწყდებიან ძალიან ძლიერ წინააღმდეგობას რუსეთის თავდაცვის ძალებისგან, მაგრამ კიდევ ერთხელ, ჩვენი ერთადერთი პასუხი არის, რომ ჩვენ ვდგავართ უკრაინის გვერდით“, – განაცხადა იენს სტოლტენბერგმა.