„მტკვარი ჰესისა“ და ბიტკოინების საკითხთან დაკავშირებით, ამ ორ საქმეზე, ჩვენ მივმართეთ პროკურატურას. ამჟამად სისხლის სამართლებრივი დევნა დაწყებულია ბიტკოინების ნაწილში, – ამის შესახებ ბიძინა ივანიშვილის ადვოკატმა, თეიმურაზ წიქვაძემ გადაცემაში „იმედი LIVE“ განაცხადა.
იგი ადვოკატ მახარაშვილის განცხადებას გამოეხმაურა, რომ გიორგი ბაჩიაშვილმა 1,300 მლნ დოლარის საკუთარი ინვესტიცია განახორციელა.
„ჩვენ, როგორც დაზარალებული მხარე, კითხვებს ვსვამთ 5 მლნ აშშ დოლართან დაკავშირებით, რომელიც ბატონი ბიძინა ივანიშვილის ინვესტიციაა და ამ 5 მლნ აშშ დოლარით გამომუშავებულ ბიტკოინებთან დაკავშირებით. შესაძლოა, ბაჩიაშვილმა შეძლო მისი ხელფასის თუ პრემიების ხარჯზე ამ 1,300 მლნ დოლარის მობილიზება, რომელსაც იგი ასევე იღებდა ჩემი მარწმუნებლის სტრუქტურებში მუშაობის დროს. ამასთან დაკავშირებით ჩვენ არანაირი პრობლემა არ გვაქვს. რა თქმა უნდა, ღმერთმა შეარგოს“, – განაცხადა ადვოკატმა.
წიქვაძის თქმით, მათ პროკურატურას „მტკვარი ჰესისა“ და ბიტკოინებთან დაკავშირებულ საქმეებზე მიმართეს, თუმცა „ამჟამად სისხლის სამართლებრივი დევნა დაწყებულია ბიტკოინების ნაწილში“.
„მტკვარი ჰესისა და ბიტკოინების საკითხთან დაკავშირებით, ამ ორ საქმეზე ჩვენ მივმართეთ პროკურატურას. ამჟამად სისხლის სამართლებრივი დევნა დაწყებულია ბიტკოინების ნაწილში. „მტკვარი ჰესის“ ნაწილი, ჩემთვის, როგორც იურისტისთვის, ჩემი აზრით, საკმაოდ რთული საკითხია. გამოსაკვლევია, ჩემი აზრით, თქმა უნდა, იკვეთება აქ პირდაპირ თანხების გაფლანგვისა და მითვისების ფაქტი, თუმცა საკვლევად საგამოძიებო ორგანოსთვის საკმაოდ რთული საკითხია. ამ ეტაპზე მაგ ნაწილში ბრალი წარდგენილი არ არის, ანუ სისხლის სამართლებრივი დევნა დაწყებული არ არის. შემიძლია დაგიდასტუროთ“, – დასძინა თეიმურაზ წიქვაძემ.