გურამ მაჭარაშვილი ვიოლა ფონ კრამონის განცხადებას ეხმაურება. „ხალხის ძალის“ წევრი აღნიშნავს, რომ ევროპარლამენტარმა ამ თემაზე ნიკა გვარამიასთან ერთად ისაუბრა და ამ თემაზე საქართველოს პრეზიდენტის პოზიციით დაინტერესდა.
„ფაქტი, რომ გვარამია ჩადის იმ ევროპარლამენტარებთან, რომლებიც საქართველოს ხან პირდაპირ მოუწოდებდნენ მეორე ფრონტის გახსნისკენ და ახლაც აფიქსირებენ, რომ ხელისუფლება უნდა შეიცვალოს, ეს პოლარიზებას შეუწყობს ხელს თუ დეპოლარიზაციას? ეს არა მხოლოდ არაევროპულია, ეს არის ანტიქართული და ანტისახელმწიფოებრივი. ერთი მაგალითი დაასახელონ, სადაც შეიძლება, რომ ევროპარლამენტარებმა მოუწოდონ საზოგადოებას ხელისუფლება რომელი აირჩიონ და რომელი არა“, – აცხადებს მაჭარაშვილი.
ევროპარლამენტარი ვიოლა ფონ კრამონი ქართველ ახალგაზრდებს მხარდაჭერას უცხადებს. ევროპელი დეპუტატი თბილისში გამართულ დემონსტრაციებს იხსენებს და ამბობს, რომ ახალგაზრდების ხელშია საქართველოს მომავალი ,სწორედ ამიტომ მიიჩნევს, რომ მათ დახმარება სჭირდებათ. ამ თემაზე ფონ კრამონმა ნიკა გვარამიასთან ერთად გამართულ პრესკონფერენციაზე ისაუბრა.