“ოჯახს სააკაშვილთან სათანადო კალორაჟის საკვები არ შეაქვს და ამის გამო წონაში იკლებს, ეს არის ერთადერთი პრობლემა”

მთავარი პრობლემაა, რომ ოჯახს სააკაშვილთან სათანადო კალორაჟის საკვები არ შეაქვს და ამის გამო წონაში იკლებს, ეს არის ერთადერთი პრობლემა, – ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებთან მიხეილ სააკაშვილთან პოლონელი ექიმების ვიზიტზე საუბრისას განაცხადა.

„იუსტიციის სამინისტრო ყოველთვის იყო გახსნილი და ისინი ოჯახის ხაზით, ყოველთვის იწვევდნენ ექიმებს, ოჯახს შესთავაზეს რომ ნებისმიერი ექიმი მოეწვიათ, რომელიც სააკაშვილის ჯანმრთელობის მდგომარეობას დააკვირდებოდა. აქედან გამომდინარე, არავის არაფერი დასამალი არ აქვს. ოჯახმა შეუტანონ სათანადო კალორაჟის საკვები და პრობლემა აღარ იქნება“, – აღნიშნა ირაკლი კობახიძემ.

მიხეილ სააკაშვილი „ვივამედში“ ევროკავშირის სამედიცინო მისიამ მოინახულა. 5 პოლონელი ექიმით დაკომპლექტებულმა სამედიცინო გუნდმა, მას კვლევები ჩაუტარა. პატიმრის გასინჯვის პარალელურად, ინფორმაცია მიიღეს კლინიკის მედპერსონალისგანაც. მედიკოსებმა, კლინიკა წუხელ უკომენტაროდ დატოვეს. სააკაშვილის ოჯახის განცხადებით, ისინი ჯერჯერობით კვლევის დეტალებზე ვერ ისაუბრებენ და არც მის შედეგებს გაასაჯაროებენ.