„როგორც ჩანს, უკრაინის სპეცსამსახურებმა გამოავლინეს ჯგუფი, ე.წ. სიკვდილის ესკადრონი, რომელიც უშუალოდ სააკაშვილს ემორჩილებოდა”, – ამის შესახებ პოლიტოლოგი ვახტანგ მაიასაია „კვირის პალიტრასთან” ინტერვიუში აცხადებს.
15 იანვარს კიევის ჟულიანის აეროპორტში საქართველოს შს სამინისტროს განსაკუთრებულ დავალებათა დეპარტამენტის შიდა ქართლის სამმართველოს უფროსის ყოფილი მოადგილე, პოლიციის ვიცე-პოლკოვნიკი გიორგი ცერცვაძე დააკავეს, ასევე ლიტვის ტერიტორიაზე დააკავეს ზურაბ მაისურაძე, რომელიც მალევე გაათავისუფლეს, მისი რუსეთისთვის გადაცემაზე კი უარი ითქვა.
როგორც ვახტანგ მაისაია აღნიშნავს, გიორგი ცერცვაძის დაკავება რუსეთმა მოითხოვა. რაც შეეხება ზურაბ მაისურაძეს, ის ლაფანყურის სპეცოპერაციაში ფიგურირებს.
„ჩემი ინფორმაციით, გიორგი ცერცვაძე, თავის დროზე, სოდ-ისა და სპეცსამსახურების ოპერატიული თანამშრომელი იყო. აღსანიშნავია, რომ სააკაშვილის გარემოცვიდან, სპეცსამსახურის თანამშრომლებიდან, უკრაინაში გია ლორთქიფანიძე გადადგა, ზურაბ მაისურაძე, გიორგი ცერცვაძე და „ზოონი”, დააკავეს. ეს უკანასკნელი საქართველოს პასპორტით გადაადგილდებოდა. ის ფიგურირებს ლაფანყურის საქმეში, მეტიც, სპეცოპერაციის ერთ-ერთი მოთავეა, გადაბირებული იყო, შემდგომში თურქეთში გაიქცა, სადაც თურქეთის სპეცსამსახურებმა დააკავეს როგორც რუსეთის სპეცსამსახურების დაქირავებული კილერი. როგორც ჩანს, უკრაინის სპეცსამსახურებმა გამოავლინეს ჯგუფი, ე.წ. სიკვდილის ესკადრონი, რომელიც უშუალოდ სააკაშვილს ემორჩილებოდა. მასში, ძირითადად, გაერთიანებული იყვნენ მაშინდელი სპეცსამსახურების ოპერატიული თანამშრომლები და მაღალჩინოსნები. „ზოონი”დააპატიმრეს და მას ბრალად ედება უკრაინელი მაღალჩინოსანი პოლიტიკოსის მკვლელობა. ლაფანყურის ოპერაციაში ზურაბ მაისურაძეც ფიგურირებს. იგი ჯერ დააკავეს, შემდეგ კი გაათავისუფლეს ლიტვაში, ეს არც იყო გასაკვირი მაშინ, როცა აქაურმა კონტრდაზვერვამ არ გამოიძია ლაფანყურის სპეცოპერაციის დეტალები. ეჭვი მეპარება, რომ ცერცვაძის დაპატიმრება რუსეთის მხარემ მოითხოვა. რუსეთს მას არც არავინ გადასცემს. უბრალოდ, უკრაინის სპეცსამსახურებს ამ პირზე ჰქონდათ ინფორმაცია, მაგრამ ის გარკვეულ დანაშაულებრივ ქმედებაში იყო მხილებული“, – განაცხადა მაისაიამ.
მისივე თქმით, სააკაშვილმა უკრაინაში ისეთივე სიკვდილის ესკადრონები შექმა, როგორიც საქართველოში იყო. როგორც მაიასაია აღნიშნავს, მის წინააღმდეგ 2017 წელს საქმე აღიძრება.
„არ გამოვრიცხავ, რომ სააკაშვილმა პირადი ინტერესებიდან გამომდინარე შექმნა ისეთივე ტიპის სიკვდილის ესკადრონები, როგორიც საქართველოში – იატაკქვეშა დაჯგუფება შეკვეთილი მკვლელობებისთვის. სავარაუდოდ, სწორედ ამ „სიკვდილის ესკადრონებმა” მოუსწრაფეს სიცოცხლე გურამ შარაძეს, როინ შავაძეს და ა.შ.
უკრაინის სპეცსამსახურებმა და უშიშროებამ ოდესაში მისი საქმიანობის შესწავლა დაიწყეს. სააკაშვილი უკრაინისთვის უკვე გუშინდელი თემაა. ალბათ, 2017 წელს სააკაშვილის წინააღმდეგ საქმე აღიძვრება, რასაც მისი დაპატიმრება მოჰყვება. სავარაუდოდ, უკრაინულ მხარეს გაუჩნდება ზურაბ მაისურაძის წინააღმდეგ მტკიცებულება და ის უფრო წინ წავა ლაფანყურის სპეცოპერაციის გამოძიების საქმეში.
როგორც ვიცი, უკრაინის პროკურატურა სერიოზულად იკვლევს სააკაშვილის როლს რამდენიმე მკვლელობაში და, სავარაუდოდ, ის მალე წარდგება მართლმსაჯულების წინაშე”, – აცხადებს მაისაია „კვირის პალიტრისთვის“ მიცემულ ინტერვიუში.