“გვაქვს საკმარისი მარაგი როგორც ტანისამოსის, ბოტის, ფეხსაცმელის, ცეცხლგამძლე ფორმის, სპეცაღჭურვილობის”

როგორც კი დგება დღის წესრიგში სარეზერვო მარაგების გამოყენება ფორსმაჟორული სიტუაციებიდან გამომდინარე, პარალელურ რეჟიმში იწყება გადაუდებელი შესყიდვის მობილიზება, რათა აუცილებელი მარაგების დონე არ ჩამოვიდეს ქვემოთ, – ამის შესახებ ჟურნალისტებს საგანგებო სიტუაციების მართვის სამსახურის უფროსმა, თემურ მღებრიშვილმა განუცხადა.

„სრული გულწრფელობით გეტყვით, ამ საკითხზე თუ რაიმე დაინტერესება გექნებათ, აუცილებლად შემეკითხეთ და დამისვით რაც შეიძლება მეტი კრიტიკული შეკითხვა. რაც შეეხება რეზინის ბოტებსა და ფორმებს, ჩვენი სამსახურის რეჟიმიდან, იმ ფორსმაჟორული სიტუაციიდან გამომდინარე, როდესაც შეიძლება, ნებისმიერ წუთს გახდეს საჭირო ჩვენი სამსახურის ჩართულობა, ჩვენ გვაქვს ძალიან საკმარისი გონივრული მარაგები. ეს ეხება როგორც ტანისამოსს, ბოტს, ფეხსაცმელს, ცეცხლგამძლე ფორმას, სპეცაღჭურვილობას და ა.შ. დაწყებული მცირე ხელსაწყოთი და დამთავრებული მძიმე სპეცაღჭურვილობით, რომელიც გაგვაჩნია მარაგებში. როგორც კი დგება დღის წესრიგში ამ სარეზერვო მარაგების გამოყენება ფორსმაჟორული სიტუაციებიდან გამომდინარე, პარალელურ რეჟიმში ვიწყებთ გადაუდებელი შესყიდვის მობილიზებას, რათა ის აუცილებელი მარაგების დონე არ ჩამოვიდეს ქვემოთ, ვინაიდან ხვალ რა სახის ღონისძიებაში და რა ფორსმაჟორულ სიტუაციაში შეიძლება მოგვიწიოს ჩართვა როგორც ქვეყანაში, ისე ქვეყნის გარეთ, ჩვენ ხომ არ ვიცით. აქედან გამომდინარე, ძალიან სწრაფად, ოპერატიულად ვახორციელებთ შესყიდვებს და მარაგების შევსებას. დღევანდელ სიტუაციაში, ძალიან არ მინდა, წავიდე სიღრმეებში, მაგრამ მინდა, მოვუწოდო კრიტიკულად განწყობილ ადამიანებს, თუ ვინმეს კითხვა გაუჩნდება, ჩემი ტელეფონი შემიძლია, პირდაპირ ეთერშიც დავასახელო, დაგვირეკონ, შეგვეკითხონ, დასვან კითხვა, მიიღონ პასუხები. წინასწარ დასკვნების გაკეთება, რომ შინაგან საქმეთა სამინისტრო, საგანგებო სიტუაციების მართვის სამსახურის თანამშრომლები და მეხანძრე-მაშველები დახეული ბოტებით დადიან, არა აქვთ, რატომ უნდა ჩათვალო, რომ არა გვაქვს, იმიტომ რომ დამატებით რეზერვები შევსებას ვიწყებთ? ძალიან უხერხულია, ტექნიკურ საკითხებს ვეხები. რაც ჩვენ ონში ვიმყოფებით ამ 400 მეხანძრე-მაშველით, უკვე ორჯერ შევცვალეთ ტანისამოსი. ჩვენ არა მარტო ჩვენს მეხანძრე-მაშველებს უზრუნველვყოფთ, არამედ სხვა სამსახურებსაც ვეხმარებით, რადგან მატერიალური რეზერვების მარაგები აქვს ჩვენს სამსახურს“, – განაცხადა თემურ მღებრიშვილმა.