საქართველოსა და თურქეთის პარლამენტების თავმჯდომარეები შეთანხმდნენ, რომ განახლდეს საპარლამენტო თანამშრომლობის სამმხრივი ფორმატი, რაც გულისხმობს საქართველოს, თურქეთისა და აზერბაიჯანის პარლამენტების თავმჯდომარეების შეხვედრებს, – ამის შესახებ ფრაქცია „ქართული ოცნების“ თავმჯდომარის მოადგილემ, ირაკლი ჩიქოვანმა ჟურნალისტებს ირლანდიაში ვიზიტისას განუცხადა.
მისი თქმით, საქართველოსა და თურქეთის პარლამენტების თავმჯდომარეებს შორის მნიშვნელოვანი შეხვედრა შედგა.
„ჩვენს ქვეყნებს შორის ძალიან კარგი და სტრატეგიული ურთიერთობა არსებობს. შეხვედრაზე ამ ურთიერთობების დინამიკას ხაზი გაესვა. ორი ქვეყნის სპიკერები შეთანხმდნენ იმაზე, რომ განახლდეს საპარლამენტო თანამშრომლობის სამმხრივი ფორმატი, რაც გულისხმობს საქართველოს, თურქეთისა და აზერბაიჯანის პარლამენტების თავმჯდომარეების შეხვედრებს.
ასევე, საუბარი შეეხო ორი ქვეყნის არსებულ დღის წესრიგს. განსაკუთრებით, ხაზი გაესვა ეკონომიკური თანამშრომლობის მნიშვნელობას. ჩვენ თურქეთთან მაღალი ხარისხის თანამშრომლობა გვაქვს, თუმცა კიდევ მეტი შესაძლებლობაა, ეს თანამშრომლობა გაიზარდოს და მხარეები შეთანხმდნენ, რომ ამას ორივე მხარე ხელს შეუწყობს.
ასევე, ვისაუბრეთ უსაფრთხოების იმ გარემოზე, რომელიც რეგიონშია შექმნილი. ძალიან მნიშვნელოვანია, რომ გამოწვევებით აღსავსე გარემოში ჩვენ გვქონდეს ძალიან ინტენსიური კომუნიკაცია და კონსულტაცია სტრატეგიულ პარტნიორთან, თურქეთთან“, – განაცხადა ირაკლი ჩიქოვანმა.
საქართველოს საპარლამენტო დელეგაციის წარმომადგენლები ირლანდიაში ევროსაბჭოს წევრი ქვეყნების პარლამენტების თავმჯდომარეების კონფერენციაზე იმყოფებიან.