დღეს ჩემი გამოსვლისას მთავარი აქცენტი გაკეთდება არაღიარების პოლიტიკაზე, მის გაძლიერებასა და უსაფრთხოების გამოწვევებზე, რომელიც დღევანდელ სამყაროში არსებობს, – ამის შესახებ პარლამენტის თავმჯდომარემ შალვა პაპუაშვილმა ანგოლის დედაქალაქ ლუანდაში საპარლამენტთაშორისო კავშირის (IPU) 147-ე ასამბლეის დაწყების წინ ჟურნალისტებთან განაცხადა.
„საერთაშორისო საპარლამენტო კავშირის 147-ე სესიაზე კავშირის ახალი პრეზიდენტის არჩევა მოხდება. ჩვენ გვქონდა შეხვედრა ტანზანიის პარლამენტის თავმჯდომარესთან, ვისთანაც ვისაუბრეთ ქვეყნებს შორის ურთიერთობაზე. მნიშვნელოვანია როგორც საქართველოს არაღიარების პოლიტიკის მხარდაჭერა, ის ასევე პრეზიდენტობის კანდიდატია. მას წინა ასამბლეაზეც შევხვდით და გვაინტერესებდა, მისი გეგმები პრეზიდენტობასთან დაკავშირებით. კერძოდ, როგორ ხედავს საერთაშორისო ასამბლეის კავშირის როლს დღევანდელ ტურბულენტურ სამყაროში. დღეს ჩემი გამოსვლისას [საპარლამენტთაშორისო კავშირის (IPU) 147-ე ასამბლეაზე] მთავარი აქცენტი გაკეთდება არაღიარების პოლიტიკაზე, მის გაძლიერებაზე და უსაფრთხოების გამოწვევებზე, რომელიც დღევანდელ სამყაროში არსებობს“, – აღნიშნა პაპუაშვილმა.