ისრაელი მზად არის, გაანადგუროს ქვეყნის მტრები, – ამის შესახებ ისრაელის პრეზიდენტმა, ისააკ ჰერცოგმა საფრანგეთის პრეზიდენტთან, ემანუელ მაკრონთან შეხვედრისას განაცხადა.
ისრაელის პრეზიდენტის განცხადებით, ქვეყანა ითხოვს მძევლების დაუყოვნებლივ და სრულად გათავისუფლებას. მისივე თქმით, არ არსებობს განსხვავება ისრაელის მოქალაქეებსა და სხვა ქვეყნის მოქალაქეებს შორის.
ისააკ ჰერცოგმა ასევე აღნიშნა, რომ ირანი ლიბანში ცეცხლს ეთამაშება.
„მინდა, განვმარტო: ჩვენ არ ვეძებთ დაპირისპირებას ჩვენს ჩრდილოეთ საზღვარზე ან ვინმესთან. ჩვენ ორიენტირებული ვართ „ჰამასის“ ინფრასტრუქტურის განადგურებაზე და ჩვენი მოქალაქეების სახლში დაბრუნებაზე, მაგრამ თუ „ჰეზბოლა“ ყველაფერში ჩაგვითრევს, ცხადი უნდა იყოს, რომ ლიბანი გადაიხდის ფასს. თქვენ მსგავსად, ჩვენ უკიდურესად შეშფოთებული ვართ ანტისემიტიზმის უზარმაზარ ზრდასთან დაკავშირებით მთელ მსოფლიოში, ასევე თქვენს ქვეყანაში. ჩვენ ვზრუნავთ მთელ მსოფლიოში ებრაული თემების ჩვენს ძმებსა და დებზე, მათ კეთილდღეობასა და უსაფრთხოებაზე. საერთაშორისო თანამეგობრობამ უნდა მიიღოს ძლიერი ზომები, რათა დაიცვას ებრაელი მოქალაქეები მთელ მსოფლიოში“, – განაცხადა ისააკ ჰერცოგმა ემანუელ მაკრონთან შეხვედრისას.
თავის მხრივ, საფრანგეთის პრეზიდენტმა აღნიშნა, რომ აუცილებელია მძევლების გათავისუფლება და მიზანმიმართული ოპერაციების ჩატარება.
„პირველი მიზანი, რაც დღეს უნდა გვქონდეს, არის ყველა მძევლის გათავისუფლება ყოველგვარი განსხვავების გარეშე, რადგან ბავშვების, მოზარდების, მოხუცების, მშვიდობიანი მოსახლეობისა და ჯარისკაცების სიცოცხლესთან თამაში საშინელი დანაშაულია. მინდა, დარწმუნებული იყოთ, რომ ტერორიზმის წინააღმდეგ ამ ომში მარტო არ ხართ. მე აქ ვსაუბრობ იმ ქვეყნის სახელით, რომელმაც, სამწუხაროდ, ეს ტერორისტული თავდასხმები განიცადა. ვფიქრობ, ჩვენი მოვალეობაა ბრძოლა ამ ტერორისტული ჯგუფების წინააღმდეგ ყოველგვარი დაბნეულობის გარეშე, მე ვიტყოდი, ამ კონფლიქტების გაფართოების გარეშე“, – განაცხადა საფრანგეთის პრეზიდენტმა, ემანუელ მაკრონმა.