უკრაინული რადის დეპუტატმა ალექსეი გონჩარენკომ უკრაინელი მაღალჩინოსანი სამხედროების წინააღმდეგ სისხლის სამართლის საქმეების აღძვრა დააანონსა.
„მიმდინარე კვირაში იქნება პროცესუალური მოქმედებები გენერლებთან დაკავშირებით. პრეზიდენტის ადმინისტრაცია თავის სვლას აკეთებს“, – წერს დეპუტატი Telegram-ზე.
სექტემბერში BBC-ის უკრაინული რედაქცია წერდა, რომ უკრაინის სამართალდამცავ უწყებებში მიმდინარეობს გამოძიება ომის პირველ თვეებში უკრაინის სამხრეთის „მტრისთვის ჩაბარების“ საქმეზე. ჟურნალისტების ცნობით, ვიწრო პოლიტიკურ წრეებში გამოძიებას „ზალუჟნის საქმე“ შეარქვეს.
უკრაინის გამოძიების სახელმწიფო ბიურომ ხერსონის ოლქის არასათანადო დაცვის საქმეზე გამოძიება ჯერ კიდევ 2022 წლის 11 აპრილს დაიწყო, თუმცა მას შემდეგ გამოძიებაში პროგრესის შესახებ ცოტა რამ არის ცნობილი. 2023 წლის მარტში უწყებამ BBC-ის უკრაინული რედაქციის კითხვაზე პასუხად განაცხადა, რომ გამოძიება ღალატის და სამხედრო სამსახურისას გამოჩენილი გულგრილობის მუხლით მიმდინარეობს.
The Economist-ში უკრაინის შეიარაღებული ძალების მთავარსარდლის ვალერი ზალუჟნის გამოქვეყნებული სტატიის შემდეგ, რომელშიც გენერალმა ომის ჩიხში შესვლა აღიარა, ზელენსკიმ განაცხადა, რომ ომი ჩიხში არ შესულა. ამის შემდეგ მედია პრეზიდენტის ადმინისტრაციასა და სამხედრო ხელმძღვანელობას შორის არსებულ კონფლიქტზე ალაპარაკდა, რომელსაც ოფიციალური კიევი უარყოფს.