მტკიცედ ვუჭერთ მხარს საქართველოს ტერიტორიულ მთლიანობასა და სუვერენიტეტს. რა თქმა უნდა, ჩვენთვის მიუღებელია ის, რომ ოკუპირებული ტერიტორიები რუსეთმა შეიძლება გამოიყენოს სამხედრო ბაზების მოსაწყობად, – ამის შესახებ ნატოს გენერალურმა მდივანმა, იენს სტოლტენბერგმა განაცხადა.
„ეს არის საქართველოს ტერიტორიული მთლიანობისა და სუვერენიტეტის კიდევ ერთი დარღვევა, რომელიც აჩვენებს, რაოდენ შორს შეიძლება წავიდეს რუსეთი უკრაინაში თავისი სამხედრო მიზნების მისაღწევად. თუმცა ეს ასევე ადასტურებს, რომ მათ თავდაცვაზე გადასვლა მოუწიათ, იმიტომ რომ უკრაინელებმა წარმატებული იერიშები განახორციელეს ყირიმში რუსეთის საზღვაო ინფრასტრუქტურაზე. შესაბამისად, რუსეთი ეძებს ალტერნატივებს, რაც ადასტურებს უკრაინის მიღწევებს რუსეთის სამხედრო-საზღვაო ძალებთან ბრძოლაში“, – აღნიშნა სტოლტენბერგმა.