სომხეთის პრემიერ-მინისტრი ნიკოლ ფაშინიანი „კოლექტიური უსაფრთხოების ხელშეკრულების ორგანიზაციის“ შეხვედრაში მონაწილეობას არ მიიღებს.
სომხური მედიის ინფორმაციით, ბელარუსული მხარის ინიციატივით, სომხეთის პრემიერ-მინისტრ ნიკოლ ფაშინიანსა და ბელარუსის პრეზიდენტ ალექსანდრე ლუკაშენკოს შორის სატელეფონო საუბარი შედგა.
სომხეთის მთავრობის პრესსამსახურის ინფორმაციით, ლიდერებმა განიხილეს 23 ნოემბერს მინსკში, „ოდკბ“-ს კოლექტიური უსაფრთხოების საბჭოს სხდომის ორგანიზებასთან დაკავშირებული საკითხები. ფაშინიანმა ბელარუსის პრეზიდენტს აცნობა, რომ შეხვედრაში მონაწილეობას ვერ მიიღებს და იმედი გამოთქვა, რომ „კოლექტიური უსაფრთხოების ხელშეკრულების ორგანიზაციის“ პარტნიორები ამ გადაწყვეტილებას გაგებით მოეკიდებიან.
სომხეთის პრემიერ-მინისტრის გადაწყვეტილებაზე კრემლში განაცხადეს, რომ სინანულს გამოხატავენ, რადგან ასეთი შეხვედრები აზრების გაცვლის ძალიან კარგი შესაძლებლობაა.