2006 წელს მოკლული რუსი ჟურნალისტის, ანა პოლიტკოვსკაიას საქმეზე მსჯავრდებული ერთ-ერთი პირი, სერგეი ჰაჯიკურბანოვი ციხიდან გათავისუფლდა და უკრაინაში საბრძოლველად გაეგმზავრა. ამის შესახებ BBC ჰაჯიკურბანოვის ადვოკატზე, ალექსეი მიხალჩიკზე დაყრდნობით წერს.
ყოფილ პოლიციელს, სერგეი ჰაჯიკურბანოვს 2014 წელს სასამართლომ 20-წლიანი პატიმრობა მიუსაჯა. თუმცა, ადვოკატის თქმით, ჰაჯიკურბანოვმა ფრონტზე გამგზავრების სურვილი გამოთქვა და თავდაცვის სამინისტროსთან 6-თვიანი სამხედრო კონტრაქტი გააფორმა, რომლის ვადის გასვლის შემდეგაც ჰაჯიკურბანოვი ვლადიმირ პუტინმა შეიწყალა.
„როგორც სპეცრაზმის ყოფილ წევრს, ჰაჯიკურბანოვს სპეციალურ სამხედრო ოპერაციაში მონაწილეობა შესთავაზეს. როდესაც კონტრაქტის ვადა ამოიწურა, ის პრეზიდენტმა შეიწყალა“, – აცხადებს ადვოკატი.
ანა პოლიტკოვსკაია, რომელიც რუსეთის ხელისუფლებას ჩეჩნეთში მიმდინარე ომის გამო მწვავედ აკრიტიკებდა, მისი სახლის სადარაბზოში მოკლეს. სერგეი ჰაჯიკურბანოვი სასამართლომ მკვლელობის პროცესში ლოგისტიკური მხარდაჭერის უზრუნველოფაში ცნო დამნაშავედ. განაჩენის თანახმად, პოლიტკოვსკაიას რუსტამ მაჰმუდოვის მიერ გასროლილმა ტყვიამ იმსხვერპლა. ამჟამად მაჰმუდოვი უვადო პატიმრობას იხდის, ისევე როგორც მისი ბიძა, ლომ-ალი გაიტუკაევი, რომელიც, გამოძიების მტკიცებით, მკვლელობის ორგანიზატორი იყო. საქმის კიდევ ორ ფიგურანტს, მაჰმუდოვის ძმებს – ჯაბრაილსა და იბრაჰიმს, 14 და 12 წლით თავისუფლების აღკვეთა აქვთ მისჯილი.