რომ არა სხვა მიმდინარე საქმეები, რომლისაც როგორც ჩანს [სალომე ზურაბიშვილს] ეშინია, შეიძლება [მიხეილ სააკაშვილი] შეწყალებულიც ჰყავდეს ამდენი ხნის განმავლობაში, – ამის შესახებ ჟურნალისტებს „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.
„იმიტომ რომ სადაც ბიძინა ივანიშვილს ოლიგარქს უწოდებს (ნაცების მესიჯბოქსიდან ერთი დეტალი ჰქონდა დარჩენილი და ახლა უკვე ესეც თქვა), შეიძლება უკვე შეწყალებულიც ჰყავდეს, რომ არა სხვა მიმდინარე საქმეები. თუ ის ამას გადაწყვეტს, უნდა ჰქონდეს კარგად გათვითცნობიერებული, რომ იქ იქნება თანამონაწილე და იმ პასუხისმგებლობის გამზიარებელი, რასაც ჰქვია ახალგაზრდების ქუჩაში დახოცვა, გაუპატიურება, მკვლელობა, წამება, ტელევიზიების მიტაცება, ბიზნესის რეკეტი. მთელი ის სიბინძურე, რაც ამ წლების განმავლობაში იყო და ტრიალებდა ამ ქვეყანაში, ამისი თანამოზიარე და თანამონაწილე იქნება“, – აღნიშნა მდინარაძემ.