ომი გაგრძელდება მანამ, სანამ არ მივაღწევთ ჩვენს მიზნებს – ღაზა აღარ იქნება საფრთხე ისრაელისთვის, – განაცხადა ისრაელის პრემიერ-მინისტრმა, ბენიამინ ნეთანიაჰუმ.
“ჩვენ ვიბრძოლეთ [“ჰამასის” მიერ აყვანილი მძევლების ნაწილის გათავისუფლების შესახებ] შეთანხმების გასაუმჯობესებლად. მე მადლობა გადავუხადე პრეზიდენტ ბაიდენს, რომელიც მუშაობდა შუამავლებთან ერთად შეთანხმების გაუმჯობესების მიზნით. სამხედრო და დიპლომატიური ძალისხმევის ერთობლიობამ წინ წაიწია [ეს პროცესი] და მჯერა, რომ ეს საშუალებას მოგვცემს დამატებითი მძევლების გასათავისუფლებლად”, – აღნიშნა ისრაელის მთავრობის მეთაურმა.
ისრაელი 50 მძევლის გათავისუფლების სანაცვლოდ, 4-დღიან ზავს დათანხმდა. შეთანხმების მიხედვით, „ჰამასი“ 7 ოქტომბერს მძევლად აყვანილ 50 ისრაელელს, მხოლოდ სამოქალაქო პირებს – ქალებსა და ბავშვებს გაათავისუფლებს.
სანაცვლოდ ისრაელი ღაზის სექტორში ცეცხლის 4 დღით შეწყვეტას დათანხმდა, პარალელურად კი, ციხიდან 150 -მდე პალესტინელ პატიმარს, ძირითადად ქალებსა და მოზარდებს გაათავისუფლებს.