“ღაზა ისრაელის სპეცსამსახურების მიერ აბსოლუტურად კონტროლირებადი ტერიტორია იქნება, მარტო იმიტომ, რომ ეს უბედურება კიდევ ერთხელ არ განმეორდეს”, – ამის შესახებ უსაფრთხოების საკითხების ანალიტიკოსმა, “კავკასიელ ხალხთა კონფედერაციის” თავმჯდომარემ, ზაალ კასრელიშვილმა მედიაჰოლდინგ “კვირას” პრესკლუბში სტუმრობისას განაცხადა.
კასრელიშვილმა ახლო აღმოსავლეთში არსებული ვითარების შესახებ ისაუბრა.
“ღაზას სექტორში მიმდინარე პროცესების, ისრაელსა და “ჰამასს” შორის ომის შესახებ ვსაუბრობთ და თუ ვინმეს ჰგონია, რომ ეს ჩვენს რეგიონს არ შეეხება, ძალიან ცდება. ამიტომ, პროცესების მიმართ ინტერესი სწორედ აქედან გამომდინარეა, თუ როგორ დალაგდება ახლო აღმოსავლეთში ქვეყნებს შორის ურთიერთობა, როგორ დალაგდება ინტერესები მათ მხარდამჭერებს შორის და ეს ყველაფერი როგორ აისახება ჩვენს რეგიონზე, შესაბამისად – საქართველოზე.
მოგეხსენებათ, ომი მიდის, ბრძოლები დიდი უპირატესობით ისრაელის არმიის მხარესაა, მათ ღაზას სექტორის თითქმის 2/3 , თითქმის 70 % გასუფთავებული აქვთ, აკონტროლებენ, აგრძელებენ წყალქვეშა დინებების გასუფთავებას, აქ მარტო გვირაბებზე არაა ლაპარაკი, არამედ სხვა ხელშემწყობ ფაქტორებზეც.
ტერიტორიის 2/3 -ის კონტროლმა და წარმატებულმა სამხედრო ოპერაციამ ისრაელის სამხედრო პოლიტიკურ ხელმძღვანელობა საშუალება მისცა, ტყვეების გაცვლასა და საომარი მოქმედებების შეწყვეტაზე ილაპარაკონ. ასეთი დამანგრეველი ომის პირობებში ტყვეების გაცვლა და საომარი მოქმედებების შეწყვეტა, რა თქმა უნდა, პოზიტიური მოვლენაა, ეს ორივე მხარისთვის შანსია, შუამავლების დახმარებით მოლაპარაკებები დაიწყოს. მაგრამ ეს მოლაპარაკებები არაა, ესაა მოლაპარაკების მცდელობა, პირველი ნაბიჯი, გენერალური რეპეტიციაა. ამ ეტაპზე, მხოლოდ ტყვეების გაცვლაზე, რამდენიმე დღით საომარი მოქმედებების შეწყვეტაზეა ლაპარაკი იმისთვის, რომ მძევლების და პატიმრების გაცვლა მშვიდობიან გარემოში მოხდეს, ვინმემ ეს არეულობა იმისთვის არ გამოიყენოს, რომ პროცესი ჩაშალოს. როგორც გაირკვა, ყველა მძევალი ერთი დაჯგუფების ხელში არაა, ამდენად, ეს მარტივი პროცესი არაა.
არის სურვილი და საერთაშორისო საზოგადოების თხოვნა, რომ ომი გადამწყვეტ ფაზაში შევიდეს და მშვიდობიანი მოლაპარაკებები გაგრძელდეს.
სამწუხაროდ, ჩვენ არ ვფიქრობთ, რომ ომი გადამწყვეტ ფაზაში შევიდა. მივედით კითხვამდე, რომელიც დაგროვებულ კითხვებს შორის ყველაზე აქტუალურია: დარჩება თუ არა ისრაელი ღაზას სექტორში? ამის შესახებ ადრეც მოგახსენეთ. მინდა, შეგახსენოთ, რომ 2008, 2009, 2010 და 2013 წლებში ჩვენი პროგნოზები დღემდე 99%-იანი ალბათობით მართლდება. ეს ტრაბახი არაა, ეს პროფესიული სიამაყეა. ვამბობდით, რომ ღაზას სექტორი აღარ იქნება. პროცესი ასე მიდის. უბრალოდ, ისრაელის არმია და მისი პოლიტიკური ხელმძღვანელობა, რუსეთის სამხედრო პოლიტიკური ხელმძღვანელობისგან განსხვავებით, სპონტანურად, ყასაბივით არ იქცევა. არ უნდა, მიზანს ერთი ხელის მოსმით მიაღწიოს. ის მიზნისკენ გზას მეთოდურად, ნაბიჯ-ნაბიჯ მისდევს. მიზანი ისრაელის ტერიტორიების ტერორისტული დაჯგუფებისგან გათავისუფლება, ისრაელის ფარგლებს გარეთ მათი მოკავშირეების გამოვლენა და შემდეგ ყველა შესაძლო მეთოდით მათზე ზემოქმედებაა. ღაზას სექტორის მოსახლეობის 2/3 – ს ისრაელი აკონტროლებს. ტერიტორიის 2/3 განადგურებულია, რომლის აღდგენას რამდენიმე წელი დასჭირდება და ამის შემდეგ ,როდესაც ლტოლვილები უკან დაბრუნებას დააპირებენ, ეს შერჩევითი დაბრუნება იქნება. ყველა ოჯახზე დოსიე არსებობს და გაირკვევა, რა ხარისხით თანაუგრძნობდნენ “ჰამასს” და თანამშრომლობდნენ მათთან. დაბრუნება ამის შემდეგ იქნება შესაძლებელი. როგორც მინიმუმ, რამდენიმე წელი ისრაელი ღაზაში იქნება. ისრაელის სპეცსამსახურებმა კარგად იციან, რა იარაღი გამოიყენა “ჰამასმა”, ვინ მიაწოდა ეს იარაღი და რა მიზანი ჰქონდათ წამქეზებლებს. როგორც ჩანს, პირველ რიგში, ომში ირანის და სხვა მუსულმანური ქვეყნების ჩათრევა უნდოდათ , მაგრამ არ გამოუვიდათ. პროცესებს ვნახავთ, იქნება ულტიმატუმები, განცხადებები, ზოგ ქვეყანასთან საქმე დიპლომატიური ურთიერთობების გაწყვეტამდეც კი მივა. სახელებით, გვარებით იციან, ვინ იყვნენ შუამავლები, რომელი ქვეყანა რა ტიპის იარაღს აწვდიდა “ჰამასს”. ამის შემდეგ ლოგიკურად, ღაზაში არჩევნები ჩატარდება. დრო გვაჩვენებს, ნამდვილი დემოკრატიული არჩევნები იქნება, თუ ნომინალური. ღაზაში ხელისუფლება აირჩევა. ღაზა ისრაელის სპეცსამსახურების მიერ აბსოლუტურად კონტროლირებადი ტერიტორია იქნება, მარტო იმიტომ, რომ ეს უბედურება კიდევ ერთხელ არ განმეორდეს.
მიმდინარე პროცესებზე შეგვიძლია, ვთქვათ, რომ მძევლების პატიმრებზე გაცვლა დაწყებულია. “ჰამასი” 50 ტყვეში 150 პატიმარს ითხოვს და ამას მიიღებს.
პროცესი უცბად, შეკვეთით ვერ დამთავრდება, თუ სათანადო ნიშნულამდე არ მივიდა
ისრაელის მოსახლეობის უსაფრთხოების უზრუნველყოფამდე, ვერც საერთაშორისო საზოგადოების ზეწოლა, ვერც მეზობელი ქვეყნების თხოვნები ვერ მოიტანს იმ შედეგს, რომ ისრაელმა ჩანაფიქრზე ხელი აიღოს . მიზანია “ჰამასის” ისრაელის ტერიტორიაზე განადგურება, მათი მარაგების, სამხედრო- პარტიზანული სადგომების განადგურება, მათზე სრული კონტროლი, ღაზას სექტორის კონტროლი.
ბუნებრივია, კითხვა ჩნდება, როგორ შეეხება საქართველოს პროცესები. საქართველოს ისე შეეხება, როგორც რეგიონს. როცა ეს ომი დამთავრდება, ისრაელი აუცილებლად გადახედავს მეგობარი, პარტნიორი, მოთანამშრომლე ქვეყნების სიას. ვფიქრობთ, მათი პრეტენზიები ჩვენს მეზობლებს შეეხებათ. მეზობელი ქვეყნების სახელებიც შემიძლია, დავასახელო, არა მარტო იმიტომ, რომ განცხადებები აკეთეს, არამედ იმიტომ, რომ კონკრეტული მასალები არსებობს , რომელ რიცხვში, რა ტიპის იარაღი მიაწოდეს , “ჰამასის” დახმარების პროცესში რა პოლიტიკური ქვეტექსტები იდო.
საქართველო ამ საქმეში სუფთაა. თუ ჩვენი ისრაელთან თანამშრომლობა უფრო ღრმა და შინაარსიან დატვირთვას მიიღებს, ძალიან კარგი იქნება. ვფიქრობთ, ისრაელის სახელმწიფოს უსაფრთხოებისთვის სასიცოცხლოდ მნიშვნელოვანი იქნება, საქართველოს სპეცსამსახურებთან თანამშრომლობის პირობები გააუმჯობესოს, გააათმაგოს, არა მარტო იმიტომ, რომ კორიდორის მეციხოვნეები გავხდით, არამედ იმიტომაც, რომ გლობალური პოლიტიკური პროცესების ორი მიმართულება ( რუსეთ- უკრაინა, შავი ზღვის აუზის ქვეყნები კასპიის ზღვის გავლით ჩინეთამდე) ჩვენს ქვეყანას ისტორიულ მისიას უბრუნებს. ეს პათეტიკა და სადღეგრძელო არაა. დროთა განმავლობაში ჩვენს ქვეყანას კიდევ უფრო მეტი ფასი დაედება, კიდევ უფრო მეტი ქვეყანა მიხვდება, რომ ჩვენთან კარგი ურთიერთობის გარეშე მათი ქვეყნების უსაფრთხოება, სახელმწიფოებრიობა ყოველთვის საფრთხის ქვეშ იქნება”, – განაცხადა ანალიტიკოსმა.
ცნობისთვის, ისრაელსა და “ჰამასს” შორის მიღწეული შეთანხმება ძალაში უკვე დღეიდან შევა. ადგილობრივი დროით დაახლოებით 16:00 საათზე პირველი მძევლების გათავისუფლება დაიწყება.
მიღწეული შეთანხმების მიხედვით, “ჰამასმა”, ჯამურად, 50 მძევალი უნდა გაათავისუფლოს.
დღეს 13 პირს გამოუშვებენ, ისრაელი კი ციხეებიდან 39 პატიმარს გამოუშვებს.
რაც შეეხება 4-დღიან ჰუმანიტარულ პაუზას, დღეიდან რაფაჰის გამშვები პუნქტის გავლით სექტორში მეტი დახმარება შევა. ყოველდღიურად იგეგმება 130 ათასი ლიტრი დიზელის საწვავის და 200 სატვირთო მანქანის გაგზავნა.
ღაზაში ისრაელის საჰაერო აქტივობა მძევლების გათავისუფლებამდე ექვსი საათით ადრე დაიწყება.
შეთანხმების მიხედვით, მძევლებს ჯერ ეგვიპტეში გადაიყვანენ, ხოლო პალესტინელ პატიმრებს – დასავლეთ სანაპიროზე, რომელსაც პალესტინის ხელისუფლება აკონტროლებს.
ამავე დროს, ისრაელის სამხედროებმა ვიდეორგოლი გაავრცელეს, რომელშიც ღაზას მოსახლეობას აფრთხილებენ, რომ ომი დასრულებული არ არის.
„ჰუმანიტარული პაუზა დროებითია. ღაზას სექტორის ჩრდილოეთ ნაწილი საბრძოლო მოქმედებების სახიფათო ზონაა და ჩრდილოეთით მოძრაობა აკრძალულია. თქვენივე უსაფრთხოებისთვის, უნდა დარჩეთ სამხრეთით ჰუმანიტარულ,” – თქვა არაბულად IDF-ის სპიკერმა, ავიჩაი ადრაიმ.