უკრაინის სამხედრო და პოლიტიკური ხელმძღვანელობა ომის გაგრძელებას ემხრობა, – ამის შესახებ ვოლოდიმირ ზელენსკის პარტიის „ხალხის მსახურის“ ფრაქციის თავმჯდომარემ, დავით არახამიამ განაცხადა.
„ახლა მოლაპარაკებების მაგიდასთან დაჯდომა არ შეგვიძლია, იმიტომ რომ მოლაპარაკების წარმოებისთვის ძალიან ცუდი პოზიცია გვაქვს. რა მოვითხოვოთ? დავასრულოთ და დავრჩეთ იქ, სადაც ვართ? თქვენი აზრით, უკრაინული საზოგადოება ამას მიიღებს?“ – აღნიშნა არახამიამ.
მისივე თქმით, ნებისმიერი შეთანხმება, გარდა უკრაინის სრული გამარჯვებისა, რეფერენდუმზე უნდა იყოს გამოტანილი.
„თუ რამის ხელმოწერამდე მივალთ და პარლამენტში ამის რატიფიცირება იქნება საჭირო, ძალიან განსხვავებული შეხედულებები იქნება, ამიტომ, ჩემი აზრით, რეფერენდუმი იქნება აუცილებელი. როცა ხალხი იტყვის, რომ ასე უნდა მოვიქცეთ, მე მოვიქცევი ისე, როგორც იტყვის ხალხი. თუ გადაწყვეტილებას დეპუტატები მიიღებენ, მე ვერ ვიპოვი ძალას იმისთვის, რომ რამე გადავწყვიტო ან სხვებს მოვუწოდო, იმიტომ რომ ეს თითოეული მოქალაქის პირადი გადაწყვეტილებაა“, – აღნიშნა არახამიამ.