გამოცემა Postimees-ის მიერ გამოქვეყნებული ინფორმაციის თანახმად, ესტონეთის შინაგან საქმეთა მინისტრმა, ლაური ლიაენემეტსმა განაცხადა, რომ ესტონეთი არ აპირებს, სამხედრო სავალდებულო სამსახურის ასაკის მქონე უკრაინელი მამაკაცები, უკრაინის ხელისუფლების ოფიციალური მოთხოვნის გარეშე, სამშობლოში დააბრუნოს.
მინისტრის ამ განცხადებას წინ უძღვოდა, ესტონელი დეპუტატის, ანტი პულამეტსის მიერ გაზეთ Riigikogu-ში დაფიქსირებული პოზიცია, რომ 7000-ზე მეტი უკრაინელი მამაკაცი, რომლებიც უკრაინაში რუსეთის სრულმასშტაბიანი შემოჭრის შემდეგ ჩავიდა ესტონეთში, „ფაქტობრივად, თავისი სამშობლოდან საკუთარ ვალდებულებების შესრულებას გამოექცა“.
დეპუტატმა ასევე გამოთქვა ვარაუდი, რომ ბევრი მათგანი შეიძლება პრორუსულად იყოს განწყობილი, არ სურდეს ფრონტის წინა ხაზზე ბრძოლა და ამ გზით უკრაინისთვის დახმარების გაწევა, ზოგი კი, შესაძლოა, ესტონეთის უსაფრთხოებას უქმნიდეს საფრთხეს.
თუმცა, ლაური ლიაენემეტსი ამბობს, რომ ესტონეთი უკრაინის ნაცვლად ვერ გადაწყვეტს, ვინ წავიდეს ფრონტზე და ვინ – არა.
შს მინისტრმა ასევე აღნიშნა, რომ ესტონეთში ჩასული უკრაინელი მამაკაცებისთვის დეზერტირის იარლიყის მიწებება არასწორია, რადგან ბევრმა მათგანმა სამხედრო სამსახურიდან გათავისუფლების ნებართვა უშუალოდ უკრაინის ხელისუფლებისგან მიიღო.