შინაგან საქმეთა მინისტრის მოადგილის, ალექსანდრე დარახველიძის განცხადებით, საქართველოს მთავრობასა და გერმანიის ფედერაციული რესპუბლიკის მთავრობას შორის მიგრაციისა და მობილობის შესახებ შეთანხმების მთავარ მიზანს საქართველოს მოქალაქეების მოწესრიგებული მიგრაციის ხელშეწყობა წარმოადგენს.
ალექსანდრე დარახველიძის თქმით, შეთანხმების საფუძველზე იგეგმება დამატებითი სამუშაო ჯგუფების შექმნა, სადაც განხილული იქნება ისეთი მნიშვნელოვანი საკითხები, როგორიც არის საქართველოს მოქალაქეების გერმანიის შრომით ბაზარზე დასაქმების არეალების გაფართოება. ამასთან, შინაგან საქმეთა მინისტრის მოადგილე განმარტავს, რომ შეთანხმების ფარგლებში ე.წ. ბალკანური მოდელი განხილული არ ყოფილა.
„შეთანხმება არის ძალიან მნიშვნელოვანია ჩვენი ქვეყნისთვის, განსაკუთრებით ევროინტეგრაციის გზაზე, მით უმეტეს იმ ფაქტორის გათვალისწინებით, რომ გერმანიამ საქართველო უსაფრთხო ქვეყნების სიაში შეიყვანა. შეთანხმების მთავარ მიზანს წარმოადგენს ჩვენი მოქალაქეების მოწესრიგებული მიგრაციის ხელშეწყობა, კერძოდ, შეთანხმების საფუძველზე იგეგმება დამატებითი სამუშაო ჯგუფების შექმნა, სადაც განხილული იქნება ისეთი მნიშვნელოვანი საკითხები როგორიც არის ჩვენი მოქალაქეების გერმანიის შრომით ბაზარზე ცირკულარული მიგრაცია, კერძოდ მათი დასაქმების არეალების გაფართოება, კერძოდ: თუ კი აქამდე მათ მხოლოდ სეზონურ სამუშაოებზე დასაქმების საშუალება ჰქონდათ, იგეგმება გაფართოვდეს სამუშაო არეალები, მაგალითად როგორიც არის ლოჯისტიკის სფერო, ტრანსპორტი, მომსახურების სფერო და ასე შემდეგ. ასევე საზოგადოებას მინდა მივაწოდო ინფორმაცია, რომ შეთანხმების ფარგლებში არ ყოფილა განხილული ე.წ. ბალკანური მოდელი, შეთანხმების არც ერთ ეტაპზე ეს საკითხი დასმული არ ყოფილა“, – განაცხადა ალექსანდრე დარახველიძემ.
შეგახსენებთ, რომ 19 დეკემბერს, გერმანიის და საქართველოს შინაგან საქმეთა მინისტრების შეხვედრის ფარგლებში ხელი მოეწერა საქართველოს მთავრობასა და გერმანიის ფედერაციული რესპუბლიკის მთავრობას შორის მიგრაციისა და მობილობის შესახებ შეთანხმებას.