ჯო ბაიდენის ადმინისტრაციამ მოკავშირეებთან მოლაპარაკებები დაიწყო გაყინული რუსული აქტივების უკრაინის დახმარების მიზნით გამოსაყენებლად. ინფორმაციას ამის შესახებ ამერიკული გაზეთი The New York Times-ი ამერიკელ და ევროპელ მაღალჩინოსნებზე დაყრდნობით ავრცელებს.
როგორც გაზეთი იუწყება, აშშ-ის კონგრესში მსგავსი ზომის მიმართ მხარდაჭერა იზრდება, რაც ოპტიმიზმის წყაროა აშშ-ის პრეზიდენტის ადმინისტრაციისთვის.
გაზეთის თანამოსაუბრეები აცხადებენ, რომ დიდი ბრიტანეთის, საფრანგეთის, გერმანიის, იტალიის, კანადისა და იაპონიის ხელისუფლებასთან შესაბამისი მოლაპარაკებები ახლახან დაჩქარდა, რადგან შეერთებულ შტატებს სურს სტრატეგიის შემუშავება 2024 წლის 24 თებერვლამდე.
საუბარია დაახლოებით 300 მილიარდი დოლარის რუსულ აქტივებზე. როგორც გაზეთი წერს, პოლიტიკოსებმა უნდა განსაზღვრონ, თანხები პირდაპირ უკრაინაში გაიგზავნება თუ კიევის ინტერესებისთვის სხვა გზებით იქნება გამოყენებული.
ისინი ასევე განიხილავენ რა შეზღუდვები შეიძლება იყოს დაკავშირებული ამ აქტივებთან. მათ შორის, შეიძლება თუ არა მათი დახარჯვა სამხედრო ოპერაციებზე თუ მხოლოდ ქვეყნის ეკონომიკის აღდგენაზე.