პარტია „საქართველოსთვის“ წევრის, ბექა ლილუაშვილის განცხადებით დემოკრატიის ყველაზე დიდი ტესტი საქართველოს 2024 წლის არჩევნებზე ელოდება.
მისი თქმით, თუ „ქართული ოცნება“ წითელ ხაზებს გადალახავს, მიიღებს საკადრის პასუხს საქართველოს მოქალაქეებისგან.
„უზარმაზარი, დემოკრატიის ყველაზე დიდი ტესტი ამ ქვეყანას წინ ელოდება და ეს არის 2024 წლის არჩევნები. ამ ტესტს ან ჩააბარებს „ქართული ოცნება“, ან არ ჩააბარებს. გადალახავს წითელ ხაზებს და მიიღებს საკადრის პასუხს საქართველოს მოქალაქეებისგან“, – განაცხადა ბექა ლილუაშვილმა.
მოძრაობა „ხალხის ძალა“, როგორც თავად უწოდებენ, პრევენციულ წერილს აქვეყნებს. წერილში ნათქვამია, რომ ხელისუფლების ოპონენტების მხრიდან, ევროკავშირთან მოლაპარაკებების გახსნის თემით მანიპულირება, უკვე დაწყებულია. მოძრაობაში აცხადებენ, რომ ოპოზიციას კონკრეტული გეგმა აქვს, რაც არჩევნების პერიოდში არეულობას გულისხმობს.