გერმანიის იუსტიციის მინისტრმა, მარკო ბუშმანმა განაცხადა, რომ გერმანია ქვეყანაში მყოფ უკრაინელებს არ აიძულებს, უკრაინაში სამხედრო სამსახური გაიარონ. ინფორმაციას ამის შესახებ გერმანული გამოცემა Deutsche Welle ავრცელებს.
გერმანიის იუსტიციის მინისტრმა აღნიშნა, რომ უკრაინის პრობლემებს ჯარისკაცების მობილიზებასთან დაკავშირებით გერმანიაში მცხოვრები უკრაინელებისთვის პრაქტიკული შედეგი არ ექნება.
“ვინაიდან ჩვენი კონსტიტუცია ადგენს, რომ გერმანიის მოქალაქეები არ არიან ვალდებულნი იმსახურონ შეიარაღებულ ძალებში მათი ნების საწინააღმდეგოდ, ვერ წარმომიდგენია, რომ ჩვენ შეგვიძლია ვაიძულოთ ხალხი სხვა ქვეყნებიდან გააკეთონ ეს”, – აღნიშნა მარკო ბუშმანმა.
მისი თქმით, გერმანიის ხელისუფლება ცდილობს უკრაინელ ლტოლვილებს შეუქმნას პირობები, რათა რაც შეიძლება მეტმა მათგანმა შეძლოს სწრაფად დასაქმება და არ იცხოვროს სოციალური შეღავათებით.
21 დეკემბერს, უკრაინის თავდაცვის მინისტრმა, რუსტემ უმეროვმა განაცხადა, რომ გერმანიასა და სხვა ქვეყნებში მცხოვრები 25-60 წლის უკრაინელი მამაკაცები მომავალ წელს გაწვევის ცენტრებში უნდა გამოცხადდნენ, წინააღმდეგ შემთხვევაში მათ მიმართ სანქციები იქნება გამოყენებული.
19 დეკემბერს, უკრაინის პრეზიდენტმა, ვოლოდიმირ ზელენსკიმ წლის შემაჯამებელ პრესკონფერენციაზე განაცხადა, რომ უკრაინის შეიარაღებული ძალების მთავარსარდალ ვალერი ზალუჟნის, თავდაცვის მინისტრ რუსტემ უმეროვსა და პრემიერ-მინისტრ დენის შმიგალს დაავალა უკრაინაში მობილიზაციის ყოვლისმომცველი გეგმის მომზადება.
“საკითხი ძალიან მგრძნობიარეა. [სამხედროებმა] მომმართეს ჩვენი სახელმწიფოს დაცვისა და პოტენციური კონტრშეტევის საკითხთან დაკავშირებით, იმ დეფიციტზე, რომელიც არსებობს და მათი შეხედულება იყო, […] მათ შემოგვთავაზეს დამატებით 450-500 ათასი ადამიანის მობილიზება”, – აღნიშნა ვოლოდიმირ ვზელენსკიმ.