ესტონეთის შინაგან საქმეთა მინისტრმა, ლაური ლაენემეცმა განაცხადა, რომ საჭიროების შემთხვევაში, ესტონეთი მზად არის, დაეხმაროს უკრაინას ესტონეთში მყოფი უკრაინის მოქალაქეების მობილიზებაში. ინფორმაციას ამის შესახებ ესტონური მედია ავრცელებს.
ლაური ლაენემეცის თქმით, ესტონეთში სამხედრო ვალდებულების ასაკის უკრაინის დაახლოებით 7 500 მოქალაქე ცხოვრობს, თუმცა “მნიშვნელოვანია გვესმოდეს, რომ ბევრი მათგანი მობილიზაციისგან გათავისუფლებულია”.
შინაგან საქმეთა მინისტრის თქმით, საერთაშორისო სამართლის შესაბამისად, უკრაინას არ აქვს შესაძლებლობა ესტონეთში მცხოვრები უკრაინელების მობილიზება განახორციელოს, ვინაიდან ამას სახელმწიფოებს შორის შეთანხმება სჭირდება, თუმცა ლაენემეცი აპირებს ოფიციალურად აცნობოს უკრაინის ხელისუფლებას, რომ თუ მათ სურთ ესტონეთში მყოფი უკრაინელი მოქალაქეების ჯარში გაწვევა, მაშინ ესტონეთი მზად არის, დადოს ასეთი შეთანხმება უკრაინასთან.