ისრაელი მიესალმება აშშ-ის მიერ გაეროს პალესტინელი ლტოლვილების დახმარების სააგენტოსთვის დაფინანსების შეჩერების გადაწყვეტილებას, – ამის შესახებ ისრაელის საგარეო საქმეთა მინისტრი ისრაელ კაცი X-ზე წერს.
„ვაფასებ აშშ-ის მთავრობის მიერ დაფინანსების შეწყვეტის გადაწყვეტილებას გაეროს პალესტინელი ლტოლვილების დახმარების სააგენტოსთვის მას შემდეგ, რაც გაირკვა, რომ ზოგიერთი თანამშრომელი მონაწილეობდა 7 ოქტომბრის თავდასხმაში. მივესალმები კანადას, რომელიც შეუერთდა ამ გადაწყვეტილებას და ვიმედოვნებ, სხვებიც მიჰყვებიან მათ. გაეროს პალესტინელი ლტოლვილების დახმარების სააგენტომ უნდა გადაიხადოს ფასი თავისი ქმედებებისთვის. ბევრი მათი თანამშრომელი არის „ჰამასის“ იდეოლოგიის მხარდამჭერი, ეხმარებიან მათ ტერორისტულ საქმიანობაში“, – წერს ისრაელ კაცი.
მისივე თქმით, მისი ხელმძღვანელობით, ისრაელის საგარეო საქმეთა სამინისტრო იმუშავებს ღაზაში გაეროს პალესტინელი ლტოლვილების დახმარების სააგენტოს საქმიანობის შეჩერებაზე.