ვილნიუსის მუნიციპალიტეტი, ახალი სასწავლო წლიდან, მეექვსეკლასელებისთვის რუსულის, როგორც მეორე უცხო ენის, სწავლების შეწყვეტას გეგმავს. სანაცვლოდ, გაფართოვდება ესპანური ენის შესწავლის შესაძლებლობები.
ვილნიუსის მერის მოადგილის, არუნას შილერისის თქმით, მუნიციპალიტეტის მიზანი ლიეტუვას დედაქალაქის სკოლებში ევროკავშირის ქვეყნების ენების ხელმისაწვდომობის გაზრდაა.
მისივე თქმით, მომავალ მეექვსეკლასელებს საშუალება ექნებათ, არჩევანი ფრანგულ, გერმანულ და ესპანურ ენებს შორის გააკეთონ. ამჟამად ვილნიუსში ესპანურს მეორე ენად 22 მოსწავლე სწავლობს.
შილერისის თქმით, მუნიციპალიტეტი უცხოური საელჩოების წარმომადგენლებთან აწარმოებს კონსულტაციებს პედაგოგების შესაძლო გაცვლის შესახებ, რათა ამ ენების მასწავლებლებზე მოთხოვნა დაკმაყოფილდეს.
ლიეტუვაში რუსული ყველაზე პოპულარულ მეორე უცხო ენად რჩება და მას მოსწავლეების 60 პროცენტზე მეტი ირჩევს. თუმცა, უკრაინაში რუსეთის ფართომასშტაბიანი შეჭრის ფონზე, რუსული ენის გაკვეთილებისადმი ინტერესი იკლებს და მოსწავლეების სულ მზარდი რაოდენობა ფრანგულს ან გერმანულს ანიჭებს უპირატესობას.
შილერისის თქმით, ვილნიუსის მუნიციპალიტეტი ესპანურს პერსპექტიულ ენად მიიჩნევს. მისი განცხადებით, ესპანურის სწავლების დანერგვაზე ამჟამად ვილნიუსის ხუთი სკოლა მუშაობს. ამ ცვლილებებისთვის მუნიციპალიტეტმა თანხები უკვე გამოყო, თუმცა მერის მოადგილე მის ოდენობას არ აკონკრეტებს.
ლიეტუვას განათლების, მეცნიერებისა და სპორტის მინისტრმა, გინტაუტას იაკშტასმა ცოტა ხნის წინ აღნიშნა, რომ ლიეტუვაშიი სულ უფრო ნაკლები ბავშვი ირჩევს რუსულს მეორე უცხო ენად და ათი წლის შემდეგ, მხოლოდ რამდენიმე სკოლა თუ შესთავაზებს მოსწავლეებს რუსული ენის გაკვეთილებს.
„მე ვიტყოდი, რომ რუსული ენა არ იქნება იმავე დონეზე, როგორზეც ფრანგული და გერმანულია. ვფიქრობ, რომ თუ დღევანდელი ტენდენციები კვლავ გაგრძელდება, რუსულის არჩევის ვარიანტები ძალიან შეზღუდული იქნება და მოსწავლეების მხოლოდ მცირე ნაწილი შეძლებს მის შესწავლას რამდენიმე სკოლაში“, – განაცხადა მან გასულ კვირას საინფორმაციო პორტალ bernardinai.lt-თვის მიცემულ ინტერვიუში.
ლიეტუვაში მოსწავლეები ინგლისურის, როგორც პირველი უცხო ენის, შესწავლას მეორე კლასში იწყებენ, ხოლო მეორე უცხო ენას მეექვსე კლასში ირჩევენ.