ბატონო შალვა, თქვენი გამოსვლის პროცესში მახსენდებოდა ილია ჭავჭავაძის სიტყვები – „უსირცხვილოს თუ არ არცხვენ, ბაძვით მორცხვიც გაურცხვდება“, ამიტომ ჩვენ თუ არ ვისაუბრებთ სიმართლეს, ისე ქვეყანას ვერ ავაშენებთ, – განაცხადა ფრაქცია „ქართული ოცნების“ თავმჯდომარის მოადგილემ, ნოდარ ტურძელაძემ პლენარულ სხდომაზე, სადაც პარლამენტის თავმჯდომარემ, შალვა პაპუაშვილმა პარლამენტის 2023 წლის საქმიანობის ანგარიში და 2024 წლის სამოქმედო გეგმა წარადგინა.
ნოდარ ტურძელაძემ ოპოზიციის წარმომადგენლებს მათ მიერ გაკეთებული განცხადებები შეახსენა და აღნიშნა, რომ ბოლო პერიოდში ოპოზიციის განცხადებები მხოლოდ მტკნარი სიცრუე და ტყუილი აღმოჩნდა.
„თქვენ არ ამბობდით, რომ ჩვენი ხელისუფლება სანქციებს უვლის გვერდს. ჩამოვიდა უცხოელების დელეგაცია და დაადასტურეს, რომ ეს იყო მტკნარი სიცრუე. თქვენ ამბობდით, რომ „ქართული ოცნების“ ხელისუფლების პირობებში ვერასდროს ვერ მივიღებდით კანდიდატის სტატუსს. საზოგადოებამ ფაქტებით ნახა, რომ ესეც აღმოჩნდა მტკნარი სიცრუე და ტყუილი. თქვენ ასვე ადანაშაულებდით „ქართულ ოცნებას“ არჩევნების გაყალბებაში და შემდეგ საგამოძიებო კომისიაშიც არ შემოხვედით, ესეც საზოგადოებამ კარგად დაინახა, რომ იყო მტკნარი სიცრუე და ტყუილი. ასევე ერთი წლის განმავლობაში, ყოველ დღე, საზოგადოებას ატყუებდით, რომ ყოფილი პრეზიდენტი ვითომდა მოწამლეს და შეიძლება ფატალური შედეგი დამდგარიყო. ესეც ტყუილი აღმოჩნდა და რამდენიმე თვის წინ გამოჯანმრთელებულმა ყოფილმა პრეზიდენტმა განაცხადა, რომ პოლიტიკაში აქტიურად ერთვება. როგორ უნდა დაგიჯეროთ თქვენ საზოგადოებამ სხვა რამ, რაზეც თქვენ საუბრობთ. როგორ უნდა დაგიჯეროთ საზოგადოებამ, რომ თქვენ ფიქრობთ ხალხზე და „ქართული ოცნება“, რომელმაც ამდენი მნიშვნელოვანი პროექტი განახორციელა და ამდენი მნიშვნელოვანი კანონი მიიღო და შესაბამისად, ეს ყველაფერი ჩვენს ხალხს და საზოგადოებას შეეხო, იტყუება და თქვენ ხართ მართლები. აქედან გამომდინარე, ვერც მანამდე ვერ მოუგეთ ჩვენ ხელისუფლებას ვერც ერთი არჩევნები და ვერც შემდგომში ვერ გაიმარჯვებთ“, – განაცხადა ნოდარ ტურძელაძემ.