ავსტრიის ყოფილი კანცლერი სებასტიან კურცი სასამართლომ ყალბი ჩვენების მიცემაში დამნაშავედ ცნო. კერძოდ, საუბარია საპარლამენტო კომიტეტისთვის მიცემულ ჩვენებაზე, რომელიც „იბიცა გეიტის“ კორუფციულ საქმეს ეხებოდა. Euronews-ის ცნობით, ვენის სისხლის სამართლის სასამართლომ ექსკანცლერს 8-თვიანი პირობითი მსჯავრი მიუსაჯა.
გამამტყუნებელი განაჩენი ეხება დანიშვნებს, რომლებიც ხორციელდებოდა სახელმწიფო საინვესტიციო ჰოლდინგ ÖBAG-ის სამეთვალყურეო საბჭოში. ამასთანავე, კურცი გაამართლეს ბრალდებაში, რომელიც ეხეხობდა ჰოლდინგის დირექტორთა საბჭოში თავისი ნდობით აღჭურვილი პირის, ტომას შმიდის დანიშვნას.
ყალბი ჩვენების მიცემაში დამნაშავედ ცნობილია კურცის კაბინეტის ყოფილი ხელმძღვანელი ბერნჰარდ ბონელიც, რომელსაც სასამართლომ 6-თვიანი პირობითი მსჯავრი მიუსაჯა. ორივე შემთხვევაში გამოსაცდელი ვადა 3 წელიწადს შეადგენს.
კურცმა განაცხადა, რომ ბრალს არ აღიარებს და განაჩენს გაასაჩივრებს.
„იბიცა გეიტის“ სახელით ცნობილი სკანდალი 2019 წლის მაისში აგორდა. მაშინ მედიაში გავრცელდა ვიდეოჩანაწერი, რომელიც 2017 წელს კუნძულ იბიცაზე, ერთ-ერთ ვილაზე ფარული კამერით იყო გადაღებული. ვიდეოჩანაწერზე ავსტრიის ყოფილი ვიცე-კანცლერი ჰაინც-კრისტიან შტრახე ჰპირდება „რუსი ოლიგარქის ნათესავს“ სახელმწიფო კონტრაქტების დადებას, სანაცვლოდ კი საკუთარი წინასაარჩევნო კამპანიის დაფინანსებას სთხოვს. „იბიცა გეიტის“ გამო 2021 წელს კურცმა პოლიტიკური კარიერა დაასრულა. მის წინააღმდეგ გამოძიება სახელმწიფო სახსრების გაფლანგვის საქმეზეც მიმდინარეობს.